Тений шошо-кеҥеж жапыште республикысе икмыняр школым «Образований» национальный проектын «Образовательный организаций-влакым уэмден вияҥдымаш» федерал программыже почеш капитально олмыктеныт. Нунын коклаште – Морко районысо Шеҥше школ. Тиде кечылаште ме тушто лийынна да чылажымат шке шинча дене ужынна.
Эн ончычак тидым палемдыман: ты тунемме верым 1966 ийыште чоҥымо да тений марте тушто ик ганат капитально олмыктымо паша ышталтын огыл. Тидлан кӧра оралте палынак тоштемын, сандене тыгай уэмдымашым тыште кужун вученыт. Мийымына годым школ директор лачак отпускышто лийын, сандене ме тушто пашам ыштыше педагог-влак дене мутым вашталтенна. Нунын кокла гыч иктыже – тыште йоча-влакым руш йылме да литературлан шӱмаҥдыше туныктышо, школ директорын воспитаний паша шотышто алмаштышыже Татьяна Валентиновна Захарова дене мутым вашталтенна.
Тудын мутшо почеш, тунемме верыште уэмден олмыктымо сомылым тений 1 мартыште тӱҥалыныт да 1 августышто мучашленыт. Уэмден ачалыме сомылым «СК Орион» чоҥышо организацийын пашаеҥже-влак шуктеныт. Нуно омсам, окна блокым, тыгак шокшым пуышо, вентиляций да вӱд системылам, леведышым, коридорысо туврашым, класслам да чыла моло пӧлемым, актовый залым, пищеблокым уэмденыт. Тидын деч посна палемдыме программе дене келшышын школлан тунемме пашаште ик эн кулешан у оборудованийым, мебельым налме. Ондак школышто пук увар лийын гын, ынде тушто – мотор линолеум. А пырдыж – кумылым нӧлтышӧ тӱсан. Татьяна Валентиновнан мутшо почеш, тӱсшым чылашт дене кутырен келшен ойырымо.
Ме тудын дене пырля столовыйыш, актовый залыш пурен лекна. Технологий предметлан лӱмын у ургымо машина-влакым налме. Теве ик классым у да мотор омсажым почна. Туштыжо — интерактивный панель, у доскаште йоча-влак фломастер дене возат. Класс пеш йоҥгыдо, йытыра да волгыдо. «Тек ӱдыр-рвезе-шамыч тыгай волгыдо класс гыч, тыгаяк волгыдо кугу илыш корныш куснат», – шке семынем шоналтышым.
– Мый 1999 ийыште Марий кугыжаныш университетым тунем пытаренам. – Вуз деч вара Нуж Ключ школыш пашам ышташ тӱҥалынам. А Шеҥше кыдалаш школышто 2008 ий гыч туныктем. Ачам ден авамат тыштак тунемыныт, – каласыш Татьяна Валентиновна.
Шеҥше школышто 2023-2024 тунемме идалыкыште шинчымашым погаш парт коклаш 108 йоча шинчын, ӱмаште 105 тунемше лийын. Тений икымше классыш шым икшыве толын. Эн шуко йоча Шеҥше села гыч коштеш, а пошкудо ялла гыч ӱдыр-рвезе-шамычым микроавтобус шупшыкта. Тудыжым ӱмаште пуэныт.
«Тек ӱдыр-рвезе-шамыч тыгай волгыдо классла гыч, тыгаяк волгыдо кугу илыш корныш куснат», – чеверласыме годым шке семынем шоналтышым.
М.СКОБЕЛЕВ
Авторын фотожо
