Марий Элым вуйлатыше Юрий Зайцев талантан йоча-влак да молодёжьлан полышым пуышо «Волгенче» рӱдерын попечитель советшын заседанийжым эртарен.
«Ме рӱдерым вияҥдыме, у проект-влакым илышыш пуртымо да талантан икшыве-шамычлан полшымо дене кылдалтше йодышлам каҥашаш погыненна. Нине йоча-влак – элнан ончыкылыкшо. Мемнан обществын сеҥымашыже нунын моштымашыштым вияҥдаш йӧным ыштымына дене кылдалтын», – каласен регионым вуйлатыше.
Республикын образований да науко министрже Лариса Ревуцкая рӱдерын 2024 ийысе пашажым иктешлен каласкален да тенийлан задаче-влакым палемден.
Ӱмаште «Волгенче» 5700 утла икшывым авалтен:
– школышто тунемше 2000 утла ӱдыр-рвезе олимпиадылан ямдылалтме, программирований, да робототехнике программе почеш шинчымашым келгемден;
– 1000 утла музык, изобразительный искусство да куштымаш усталыкым шуарен;
– 400 йоча спорт туризм, футбол да спортын моло видыштыже моштымашым вияҥден.
2025 ийыште регион кӱкшытан 55 мероприятий лийын, тушко 3800 утла участник ушнен. 7 команде «Технострелка» тӱнямбал фестивальыште республикнан чапшым кӱшнӧ кучен.
Заседанийыште иктешлымаш тыгай лийын: талантан йоча-влак дене пашам ыштыме шотышто муниципальный координационный рӱдерын еҥже-влак идалык мучко дене совещаний ден семинар-влакым эртараш.
Тыгак республикысе кӱшыл тунемме вер ден индустриальный партнёр-влак дене вашкылым кумдаҥдыме шотышто кӱлеш пашам (научный шымлымашым, предприятий ден лабораторийлаште практикым да стажировкым, мастер-классым, конкурсым да молымат) кумдандаш. Вуз-влак дене пырля уш-акылым, тыгак усталык, спорт дене кылдалтше мастарлыкым вияҥдыме олимпиаде, конкурс-шамычын спискыштым ямдылаш палемдыме.
Попечитель советын эше ик пунчалже: талантан йоча-влак дене пашам ыштыме шотышто муниципальный координационный совет-влакын пашаштым аклыше мониторингым эртараш.
Марий Эл вуйлатышын пресс-службыжын уверже негызеш Галина Кожевникова ямдылен
Денис Речкинын фотожо
