Шке жапыштыже Волжский районысо Памар школым тунем лекше Кристина Калугина (Петрусенко) специальный военный операцийым эртарыме кумдыкышто фельдшерлан 2024 ий годсек тырша. Позывнойжо – «Сойка».
Россий Федерацийын Обороно министерствыж дене контрактым ыштымыж деч ончыч Волжск оласе рӱдӧ больницын терапевтический отделенийыштыже медсестралан пашам ыштен.
Землячкына 8 Март вашеш «Александрийцы» фронтовой газетын корреспондентшылан интервьюм пуэн. Тудын икмыняр ужашыжым тыландат лудаш темлена.
* * *
«Тидыже мылам молан кӱлеш? – военный билетым кучыктымо годым ӧрын йодынам. «Сар тӱҥалеш, да тушко кает», – кукшын вашештеныт. Тевыс, тудо жап шуын, да ынде мыят сарыште улам. Гражданкыште больницыште пашам ыштенам. Ковидым тӱҥалтыш гыч мучаш марте эртенам. Тидат шкешотан сар лийын, шонем. Специальный военный операцийыште шкеман вел шуко рвезе вуйжым пыштен, сандене мыят тышке контракт почеш толаш шонен пыштенам. Вес амалат таратен: эргым кушкеш, тудланат лӱддымылыкым ончыкташ кӱлеш. Ешыштына мый гына военнообязанный улам. Эргым, конешне, тургыжлана, шортеш, но мый денем кугешна, чылалан ойла: «Авам – герой!» Мыйым тиде моткоч кумылаҥда».
* * *
«СВО кумдыкышто мо ышталтмым мыняр-гынат паленам, сандене шкемым чыла шотыштат ямдыленам, вет тыште ны шинчавӱдым, ны вийдымылыкым ончыкташ огеш лий. Тыште эре виян лийман! А сусыргышо салтак-влак ончылнышт вичкыж капкылан ӱдырым ужыт да шкеныштым чын пӧръеҥ семын кучаш тыршат, чот корштымым, ала-мо деч лӱдмым огыт ончыкто».
* * *
«Фронтышто пӧръеҥ-влак гражданкысе гай огытыл. Мый отпускышто ик ий лийын омыл ыле. Шукерте огыл мӧҥгӧ миен тольым. Граждан илышым ир шинча дене манме гай эскерышым. Тушто мындырланен илат, тыште пӧръеҥ-влакын пашам кыртмен ыштымышт, вуйым пыштымышт нерген огыт шоно. Нунын эсогыл шинчашт, шинчаончалтышышт весе! Да нунын дене йӧршынат оҥай огыл, вет ала-могай проблемышт нимомат огеш шого!..»
* * *
«Госпитальыште пашам ыштымем годым 19 ияш рвезылан Российын Геройжо лӱмым пуышт. Мутшо почеш, тудо ала-мо тугай кугум поген налын, а мый ӱмбакыже ӧрын онченам да тудын дене утыр кугешненам – изи капан, каҥга, самырык, но уже – Российын Геройжо!»
* * *
«Чыла родемлан саламым ойлем. Сеҥымаш садак мемнан пелен лиеш, да ме вашке мӧҥгӧ пӧртылына».
Меат Кристина Игоревналан мӧҥгышкӧ вашкерак пӧртылаш да илыш корныштыжо шуко куаным, йӧратымашым да пиалым ужаш тыланена.
Елена Никитина,
Памар библиотекын вӱдышӧ методистше
Маргарита Иванова ямдылен
Снимкыште: Кристина Калугина (Петрусенко)
Фотом Памар библиотекын воткыл лаштыкше гыч налме.
