Кодшо кечылаште республикысе муниципальный район образованийлаште кандашымше созыв депутат-влак погынымашлан сессийышт эртаралтыныт. Чыла вережат эн тӱҥ йодыш семын муниципал район вуйлатымашым сайлымаш шотлалтын. Могайрак сӱрет, ончалына.
Тыгай районлаште уэш сайлалтыныт:
Звенигово район – Наталия Викторовна Лабутина, алмаштышыже – Василий Васильевич Корнилов.
Марий Турек район – Лариса Алексеевна Яндыбаева, алмаштышыже – Юрий Александрович Зайцев.
Медведево район – Рузяль Нуриазданович Усманов.
Советский район – Сергей Михайлович Халтурин.
У Торъял район – Евгений Викторович Небогатиков, алмаштышыже – «Единый Россий» партийын верысе политсоветшын еҥже, У торъял посёлкым вуйлатыше Галина Юрьевна Звягинцева.
Юрино район – Ирина Витальевна Куклева.
Тыгай районлаште вашталтыш лийын:
Волжский муниципал район вуйлатышылан, депутат-влак погынымашын председательжылан Валериан Аркадьевич Семеновым шогалтышаш верч йӱкленыт. В.Семенов ятыр ий Пӧтъял кыдалаш школын директоржылан ыштен. Сессий жапыште Марий Эл Кугыжаныш Погын вуйлатышын алмаштышыже Лариса Яковлева муниципальный образованийын ончычсо вуйлатышыже Владимир Сергеев ден Упшер ял шотан поселений вуйлатыше Николай Николаевлан Кугыжаныш Погынын таумутшым кучыктен.
Килемар район – Сергей Дмитриевич Преснецов, Килемар кыдалаш школышто туныктышылан, директорлан ыштен, 2019 ий сентябрь гыч – Килемар ола шотан илемын вуйлатышыже.
Курыкмарий районышто кандашымше созыв депутат-влак погынымашын икымше сессийже 25 сентябрьыште эртаралтын. Тудым эн кугу ийготан депутат Олег Степанович Ванюков почын. Каҥашыме 14 йодыш кокла гыч район вуйлатыше Галина Ананьевна Ямолкинан должность гыч кораҥмыже да у вуйлатышым сайлымаш дене кылдалтше йодыш-влак ик эн тӱҥ лийыныт. Тыге Курыкмарий район вуйлатыше, депутат-влак погынымашын председательжылан Евгений Валерианович Смеловым сайленыт. Евгений Смелов тӱрлӧ вере пашам ыштен, а пытартыш 19 ий утлаже муниципальный район администраций вуйлатышын социальный йодышла дене алмаштышыже лийын,
Кужэҥер район депутат-влак погынымаште ик йӱк дене Кужэҥер район вуйлатышылан Ольга Васильевна Ярыгинам сайленыт. Чылаже 16 йодышым каҥашеныт, район администраций вуйлатышын пашажым жаплан шуктышылан Михаил Григорьевич Ивановым шогалташ пунчалыныт.
Морко районышто 16 октябрьыште эртыше сессийыштышт депутат-влак район вуйлатышылан администраций вуйлатышын икымше алмшташыже, архитектур, капитальный чоҥымаш да муниципальный озанлык пӧлкан руководительже Гарафий Салихзянович Хуснутдиновым сайленыт. Марий Эл вуйлатышын алминистрацийжын руководительже Лидия Батюкова, Кугыжаныш Погын депутат Наталья Пушкина да молат ончычсо вуйлатыше Светлана Михайловна Ивановам тауштен саламленыт.
Оршанке районышто Андрей Викторович Шабалиным сайленыт. Тылеч ончыч ты пашам шуктышо Александр Леонидович Плотников 3 октябрь гыч Оршанке район администраций вуйлатышын пашажым жаплан шуктышылан шотлалтеш.
Параньга район вуйлатыше, депутат-влак погынымашын председательже – Альфит Габдулхакович Ибраев. Ятыр ий Параньга район администрацийын вуйлатышыже лийын.
Шернур районышто депутат-влак вуйлатышыштлан Валентина Дмитриевна Таникеевам сайленыт. Тудо «Шернур вел/ Край сернурский» райгазет-влак АУ-м вуйлатен.
Тыгеракын, 8 муниципальный районышто район вуйлатыше, депутат-влак погынымашын председательже вашталтын, 6 районышто ончычсо вуйлатыше-влакланак ӱшаным ыштеныт.
Муниципальный район вуйлатыше коклаште:
— пӧръеҥ – 9
— ӱдырамаш – 5
ххх
«Йошкар-Ола» ола округын вуйлатышыже, депутат-влак погынымашын председательже – Лев Константинович Покровский. Тылеч ончыч Йошкар-Ола мэрын икымше алмаштышыже лийын.
«Волжск ола» ола окургын вуйлатышыже, депутат-влак погынымашын председательже – Рафис Минзагитович Шагвалеев. Пытартыш кок ият пеле Волжск олан мэрже лийын.
«Козьмодемьянск ола» округын вуйлатышыжлан уэш Игорь Николаевич Волковым сайленыт.
Чыланат, 17 вуйлатыше, «Марий Эл Республикын муниципальный образований советышкыже» пурат.
Палемдымаш: муниципал район депутат-влак погымышлаште тыгак район администрацийым вуйлатыше должностьыш шогалтыме шотышто документ-влакым ямдылыме радамым рашемденыт.
Лидия СЕМЕНОВА
Снимкыште: У Торъял район депутат-влак погынымашын сессийже годым
Фотом соцкыл гыч налме
