Марий Эл Тазалык аралтыш министерствын заседанийыштыже 2023 ийыште ыштыме пашам иктешленыт. Мероприятийыште Марий Элым вуйлатыше Юрий Зайцев участвоватлен.
Коллегийын заседанийжым почмо годым регионым вуйлатыше медицинын калык илышыште кугу верым налмыжым палемден.
«Здравоохранений» национальный проектын кышкарыштыже ойырымо 9 миллиард утла теҥге, медицине полышын качествыж ден йӧнжым кугемден, кугу вашталтышым ыштен. Республикын медицине службыжо икмыняр показатель дене россий здравоохраненийыште эн ончылно кайышылан шотлалтеш. Пытартыш ийлаште регионышто здравоохраненийын первичный звеножым палынак пеҥгыдемден кертме. Фельдшер-акушер пункт ден врачебный амбулаторий-влакым чоҥымо да келшыше оборудований дене шыҥдарыме, поликлинике-шамычым капитально олмыктымо. Тора ял ден селалашке куснылшо медицине комплекс-влак лектын коштыт», – манын республикым вуйлатыше да тора ялла гыч районысо эмлымверыш тазалыкым тергыкташ, врач дене мутланаш кондыштарыше 90 утла автомобильым налме, рентген оборудованийын чумыр гаяк паркшым уэмдыме, кызытсе цифровой аппаратым конден шындыме, тений регионышто илыше 500 тӱжем наре еҥлан диспансеризацийым эртараш палемдыме нерген ушештарен.
Тазалык аралтыш министр Марина Панькова докладыштыже здравоохранений системын эртыше ийысе паша лектышыжым палемден. Мутшо гыч, ончылийысе дене таҥастарымаште ӱмаште Марий Элыште калыкын колымо чотшо 3,1 процентлан иземын, ӱмыржӧ 1 процентлан кужемын, 1 ияш марте ийготан йоча-влакын колымо чотышт 40 процентлан иземын, абортын показательже – 9,6 процентлан.
2023 ийыште диспансеризаций дене 197 тӱжем еҥым авалтыме, тидыже 2022 ийысе показатель деч 18,5 процентлан шукырак.
2019-2023 ий-влаклан палемдыме «Ялысе доктор» ден «Ялысе фельдшер» программе-влакым тичмашнек шуктымо. Тиде жапыште регионын Тазалык аралтыш министерствыже 162 медицине пашаеҥ дене ойпидышым ыштен.
«Здравоохраненийын первичный звеножым модернизироватлымаш» регионысо проектым илышыш пуртымо кышкарыште Кокшайск ден Силикатный врачебный амбулаторий-влакым, Тат-Китне ФАП-ым да Юрино районысо больницын поликлиникыжым чоҥен шуктымо.
Ӱмаштак регионысо бюджетын средстваж кӱшеш медицине пашаеҥ-шамычлан ешартыш выплатым пеҥгыдемдыме. Тений врач-влаклан илыме верым саемдаш социальный полышын 3 миллион теҥге кугытан ешартыш мерыжым ышташ палемдыме.
Ю.Зайцев медик-влаклан куштылгыжак огыл пашам шуктымыштлан тауштен.
Коллегийын кышкарыштыже тыгак республикысе медицине пашаеҥ-влакым тӱрлӧ награде дене палемденыт.
Марий Элым вуйлатышын пресс-службыжын уверже негызеш М.ИВАНОВА ямдылен
