Эртыше арнян Марий Элым вуйлатыше Юрий Зайцев специальный военный операцийым эртарыме кумдык гыч отпускыш толшо военнослужащий-шамыч дене икмыняр гана вашлийын.
Регионым вуйлатыше СВО-м эртарыме кумдыкышто снабжений, быт условий да сарзе шӱлыш дене кылдалтше йодышлам рашемден. СВО-н участникше-шамыч, Марий Эл гыч военнослужащий-влаклан гуманитар грузым, кӱлешан арвер ден оборудованийым чӱчкыдын намийымым палемден, Ю.Зайцевлан тӱткышым ойырымыжлан да полшымыжлан тауштеныт. Республикым вуйлатыше черетан гуманитар грузым погымо годым нунын темлымашыштым шотыш налаш сӧрен.
Ю.Зайцев Советский районыш паша дене мийымыж годымат СВО-н участникше-влакын ешышт дене вашлийын, нуным шушаш Еш, йӧратымаш да ӱшанле улмо кече дене саламлен. Вашлиймаш годым сарзе-шамычлан порысым ӱшанлын шуктымыштлан, а ӱдырамаш-влаклан марийыштлан полшымыштлан, пеҥгыде тыл улмыштлан тауштен.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
