21 мартыште Марий Элысе Калык-влакын тӱвыра пӧртыштышт «Уло еш дене» проектыш ушнышо-влак угыч иквереш чумыргеныт ыле.
Амалже – Волжский, Звенигово, Кужэҥер, Марий Турек, Медведево, Морко, Шернур, Советский районла да Йошкар-Ола гыч чылаже 16 еш «Уло еш дене сайлымашке» акцийыште ойыртемалтыныт, да нунылан ты кечын пӧлекым кучыктышт.
Кучыктышт тыглай гына огыл, а лотерей семын эртарен. Вет тылеч ончыч кажне еш цифрым ойырен нале, вара нунын дене келшышынак пӧлек-влак дене палемдышт. Пӧлекше ты ганат сай улыт ыле. Мутлан, республикысе калык усталык рӱдерын концертлашкыже, М.Шкетан лӱмеш марий национальный драме театрын спектакльлашкыже, Т.Евсеев лӱмеш национальный тоштерыш да тудын филиаллашкыже, Ий полат ден Вӱд полатыш ӱжмаш-влак, тыгак тӱрлӧ моло пӧлек лийыныт.
Кодшо ганасе вашлиймаш Ӱярня арнян эртаралтын, да еш-влак чыланат мелнам кӱэшт конденыт ыле гын, ты гана кажныже могай-гынат номер дене куандарыш. Мутлан, Йошкар-Ола гыч Зотовмыт еш йомак гыч ужашым модын ончыктыш. Волжский район гыч Кудрявцевмыт еш театрализоватлыме куштымаш дене кумылым нӧлтыш, икмынярын почеламутым, южышт шке возымыштым, лудын пуышт. Звенигово район гыч Любовь Пакалина оҥай модыш дене модыктыш. Эн ончычак тудо кумылан-влаклан мужыр пижым пуэдыш, а вара тӱрлӧ заданийым ыштыктыш. Йошкар-Ола гыч Никоновмыт еш нерген мурым йоҥгалтарышт. Марий Турек поселко гыч Шуталевмыт гын шке ешышт нерген возымо да видеошко сниматлыме мурым экраныште ончыктышт да пырлят мурышт. Шернур район гыч толшо Шулеповмыт-Гусевмыт еш, гармоньым шоктен, чӱчкен, сӱан такмак-влак дене куандарыш. А тыгай весела семым колмеке, верыштет шинченжат от керт. Санденак чылан гаяк, ӱстел кокла гыч лектын, йыр шогалын, пырля мурышт да куштышт. Мероприятий мучашлалтмекат, тиде еш Калык-влакын тӱвыра пӧртыштын эсогыл фойешкыже кусныш да кумылан-влакым тушто гармонь почеш эше кужун куштыкыш да мурыктыш.
Любовь Камалетдинова
Авторын фотожо
