Марий Элыште «Профессионалитет» федерал проект кышкарыште кок у тунемме-производство кластер почылтеш.
Тыгай рӱдерым республикын чоҥымо да транспорт отрасльже-влаклан 2025 ийыште ышташ палемдыме. Образований да производство коклаште пеҥгыде вашкылым ыштыме, нине сфер-влаклан специалист-влакым ситарыме йодышлам решатлаш тиде моткоч кӱлешан ошкыл. Тидын нерген Марий Элым вуйлатыше Юрий Зайцевлан регионын образований да науко министрже Лариса Ревуцкая каласкален.
Кажне кластерым ышташ федеральный бюджет гыч 100 миллион теҥге, республикын гыч 15 миллион теҥге гыч ойыралтеш да 47 миллион теҥгем кундемысе предприятий ден организаций-шамыч пуат.
Тунемме-производсто рӱдер-влак Йошкар-Оласе строительный ден Автодорожный техникумлаште почылтыт.
Юрий Зайцев ушештарен, Россий Федераций президент Владимир Путин кызытсе илышлан ик эн кӱлешан кадрым ямдылымаште «Профессионалитет» проектын кӱлешлыкшым палемден. Элнам вуйлатышын мутшо почеш, таче профессионал образований системым да специалист-влакым ямдылымым паша рынкысе йодмашыжлан келшышын уэмден вияҥдыман.
«Федеральный проект кыдалаш образованийым качестваным ышташ, выпускник-шамычлан сай пашадаран паша верым муаш, а предприниматель-влаклан кадр йодышым решатлаш йӧным ышта манын ӱшанем», – каласен республикым вуйлатыше.
Тунемме-производство кумдык-влак регионысо чоҥымо да транспорт отрасль-шамычын ик эн ончыл предприятий ден организацийлажым, тыгак кыдалаш образованийым пуышо 8 тунемме верым иктеш уша.
Кок кластерыште чумыр налмаште тачысе паша рынкылан ик эн кӱлешан 20 профессий ден специальностьлан туныкташ тӱҥалыт.
Марий Элым вуйлатышын пресс-службыжын уверже негызеш Галина Кожевникова ямдылен