Регион-влак кокласе кылым пеҥгыдемдыме шонымаш дене Марий Элыш Владимирский область гыч пашаче делегаций толын.
Визит программе Йошкар-Ола дене палдарыше экскурсий гыч тӱҥалын. Делегаций «Оласе йырвелым йӧнаным ыштымаш» федерал программылан кӧра саемдыме кумдыклам – Черняков лӱмеш чоҥалтше бульварым, Кӱртньыгорно пашаеҥ-влакын скверыштым да Тӱвыра да каныме рӱдӧ паркым – ончал савырненыт. Владимирский область гыч толшо-влак Воинын чапшылан монумент ончыко пеледышым пыштеныт.
Тыгак уна-шамыч Республикын площадьыштыже, Йошкин пырыслан скульптур воктене да Оболенский-Ноготковын площадьыштыже лийыныт.
Визит жапыште оласе йырвелым тӱзатыме да турист куатым ешарыме шотышто йодышлам авалтыше мутланымаш ден совещаний-влак эртат. Тушто туризм сферыште ваш келшен пашам ыштыме шотышто темлымаш-влакым каҥашаш тӱҥалыт.
Уна-влаклан спорт ден турист инфраструктурын образцовый объектше-шамычым, республикысе Самырык-влакын полатыштым да Э.Сапаев лӱмеш академический опер да балет театрым ончыктат. Марий Элын турист куатше дене палдарыме годым мемнан кидмастар-влакын усталыкыштым ончыктымо выставке да мастер-класс-влак эртат.
Тыгак Марий Эл ден Владимирский область коклаште туризм сферыште ваш келшен пашам ыштыме шотышто ойпидышым пеҥгыдемдышаш улыт.
Марий Эл вуйлатышын пресс-службыжын уверже негызеш Светлана Носова ямдылен.
