Федераций Советын делегацийже дене пырля Марий Элым вуйлатыше Юрий Зайцев Ляонин провинцийыш пурышо Далянь олаште лийын. Тушто провинцийын Китай коммунист партий комитетшын икымше секретарьже, калык представитель-влак погынымашын председательже Хао Пэн дене вашлиймаш эртен.
Россий парламентын кӱшыл палатыжым вуйлатыше регион-влак кокласе кылын вияҥын толмыжым палемден. Федераций Советын спикержын мутшо почеш, тыгодымак пырля илышыш пуртымо проектлашке Российын ятыр регионжо да Китайын провинцийже-шамыч ушненыт.
«Тений «Юл – Янцзы» тыгай проектым шыҥдараш тӱналмылан лу ий темын. Тудо Юл кундем федерал округысо регионла ден Янцзы эҥерын кӱшыл да кокла ужашыже кундемыште верланыше провинцийлам авалта. Тыгодым вашкыл у кӱкшытыш шуын: тиде ынде торговльо да экспорт веле огыл, тыгак кӱкшӧ технологиян кыл. Кооперацийым да инвестицийым кумдаҥдымылан кӧра чек пеленысе инфраструктурым вияҥдымылан тӱткышым ойырыман, логистикым уэмдыман», – каласен Валентина Матвиенко.
«Юл – Янцзы» проектыш Марий Эл икмыняр ий ончычак ушнен. Тӱҥ шотышто сату оборот кушкеш, Юл кундем ден Китайысе вуз-шамыч коклаште кыл вияҥеш. Марий Эллан ончыкыжым тудо IT-направлений, ялозанлык сферлан, промышленностлан, тӱвыралан да туризмлан лектышан лиеш. Республик правительствын задачыже – йот элласе партнёр-влак дене экономике кылым пеҥгыдемдаш.
Делегаций дене пырля Юрий Зайцев «Герой-влаклан курымашлык чап» шарныктыш ончыко пеледышым пыштыме торжественный церемонийыште лийын.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен.
