Марий Эл ден «Россий – йӧным пуышо эл» президент платформо коклаште вашкыл пеҥгыдемеш: нуно ӱшанле партнёрыш савырненыт. Тыгак Россий президент Владимир Путинын тӱҥалтышыж почеш илышыш пурталтше «Герой-влакын жапышт» проектын регионысо «Марий Элын Геройжо-влак» программыже шыҥдаралтеш. Тудын моткоч кӱлешан кок кугу цельже уло: специальный военный операцийын участникше-влаклан полшаш, виктарыме кадр резерым ышташ.
Ойпидышыш кидпалыштым республикым вуйлатыше Юрий Зайцев ден «Россий – йӧным пуышо эл» россий автономный коммерческий огыл организацийын генеральный директоржо, «Сенеж» мастерскойын виктемжын ректоржо Андрей Бетин пыштеныт. Тӱҥ шонымаш – тӱрлӧ сферыште самырык-влаклан личность семын да профессионал могырым вияҥашыштыт йӧным ышташ, сай да пайдале проект-влакым илышыш пурташ полшаш.
«Марий Эл ден «Россий – йӧным пуышо эл» платформо талантан молодёжьлан у чекым почаш пырля пашам ышташ тӱҥалеш. Тиде кажне самырык еҥлан элнан вияҥмашкыже надырым пышташ да шке шонымашыш шуаш полшышо системе», – каласен республикым вуйлатыше Юрий Зайцев. Ойпидыш дене келшышын, паша икмыняр направлений дене ышталташ тӱҥалеш, регион ден президент платформо кокласе вашкылым эшеат пеҥгыдемда да у кӱкшытыш нӧлталеш.
«Марий Эл правительстве – ӱшанле партнёрна. Эртыше куд ийыште регионын 107 тӱжем утла еҥже «Россий – йӧным пуышо эл» президент платформын эртарыме конкурсшын, олимпиадыжын, проектшын участникше лийын. Тышеч 540 участник финалист радамыш лектын, а 260 – сеҥышыш. Тиде ойпидыш тыгак республикысе калыкын илышыжым социальный могырым саемдаш виктаралтын», – палемден Андрей Бетин.
Чыла тидын деч посна ойпидыш Марий Эл ден президент платформо коклаште коклаште коммуникаций сферыштые вашкылым пеҥгыдемден вияҥдышаш. Тыгак тудо Российысе субъект-шамычлан элнан президентшын 2021 ий 4 февральысе «РФ субъект-влакын да кӱшыл должностной лицаштын (кугыжаныш кучемын кушыл исполнительный органже-шамычым вуйлатыше-влакын) пашаштлан акым пуымо нерген» кӱштымашыжын «Йоча да самырык-влакын моштымашыштым да талантыштым вияҥдаш полышым пуымо пайдале системе» 7-ше пунктшым илышыш пурташ йӧным ышта.
Палемдыман, «Россий – йӧным пуышо эл» президент платформо деч посна республикыштына Россий президент Владимир Путинын тӱҥалтышыж почеш илышыш пурталтше «Герой-влакын жапышт» проектын регионысо «Марий Элын Геройжо-влак» программыже шыҥдаралтеш. Тудын моткоч кӱлешан кок кугу цельже уло. Икымшыже – специальный военный операцийын участникше-влаклан полшаш, нунын куатыштым тыныс илышыште кучылташ. Кокымшо – виктарыме кадр резерым ышташ.
Марий Эл вуйлатышын пресс-службыжын уверже негызеш Галина Кожевникова ямдылен
