Марий Эл вуйлатышын кӱштымыж почеш Йошкар-Олалан 50 у пассажир автобусым налыт.
Тидым 2023 ий I-ше кварталыште ышташ палемдалтеш. У автобус-влак оласе тӱҥ маршрутлаште кошташ тӱҥалыт.
Регион вуйлатыше совещанийыште палемден: олаште илыше-влак деч автовокзалын пашам ыштымыж, пассажир транспортын расписанийым шотыш налде кудалыштмыж, икмыняр моло шотышто вуйшиймаш-влак пуреныт.
Республикын транспорт да корно озанлык министрже Александр Герасименкон ойлымыж почеш, частный перевозчик-влак велым тыгай ситыдымаш-влак чынже денак палдырнат. У пассажир автобус-влакым налме ты экшыкым кораҥдаш да сӱретым вашталташ полшышаш. Тыгак тудо ешарен: шушаш ийынак 5 троллейбусым налаш палемдалтеш. Нуно Ширяйково микрорайон, Киров да Строитель урем-влак гоч кошташ тӱналыт.
Министр «Йошкар-Ола» автовокзал шотышто тыге каласен: тудо Марий Элым социально-экономически вияҥдыме индивидуальный программым илышыш пуртымо кышкарыште чоҥалтын да 2022 ийыште пашам ышташ тӱналын. Вокзал пассажир, водитель, перевозчик-влаклан лӱдыкшыдымым ыштыме да йӧнан улмо шотышто чыла йодмашлан келшен толеш. Адакшым окса дене кылдалтше показатель-влак тудын рентабельный улмыжым ончыктат.
– Вокзалын кузе пашам ыштымыж шотышто еҥ-влак деч ме жапын-жапын йодыштмашым эртарена. Иктаж-могай вашталтыш кӱлеш гын, тидым вигак шотыш налына да тӧрлатымашым пуртена. Билетым ужалыме дене кылдалтше вуйшиймаш лийын ыле. Тиде йодышымат рашемденна. Ынде билетым вокзалыштат, автобусыштат ужалат, – рашемден Александр Герасименко.
У автовокзал гыч кызыт кажне кечын 45 маршрут дене 2000 наре еҥ кудалыштеш. Ик кечыште тушеч автобус-шамыч тӱрлӧ кундемлашке чылаже 300 утла гана каят. Кызыт ты вокзал гыч республикысе районлашке веле огыл, тыгак Чебоксарыш, Яранскыш, Казаньыш, Москвашке миен шуаш лиеш. Ончыкыжым Самарыш, Санкт-Петербургыш, Нижний Новгородыш, Саратовыш рейсым почаш палемдалтеш.
Совещанийыште тыгак тошто автовокзал нергенат мутланеныт. Марий Эл вуйлатышын ойлымыж почеш, траспорт лӱдыкшыдымылык дене кылдалтше йодыш моткоч кӱлешан, да тудым решатлаш кӱлеш.
Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен.
