Марий Элысе Транспорт да корно озанлык министерствын палдарымыж почеш, тений идалык мучаш марте республикысе корныла гыч 50 процентшым нормативлан келшышын шотыш конден шукташ палемдалтеш. Але марте 44 %-те пашам ыштыме.
Мутлан, У Торъял районышто райрӱдӧ воктеч эртыше корным тӧрлымӧ паша мучашке лишемеш. 9 километр кужытышто вӱд пуч-влакым ачаленыт да асфальт-бетоным кок пачаш шареныт. Кызыт корно тӱрым пеҥгыдемдымаш да разметкым ышташ кодын.
Тиде паша «Лӱдыкшыдымӧ сай качестван корно» нацпроект дене келшышын шукталтеш. Тудын акше 147,5 миллион теҥгешке шуэш.
Тылеч посна тений идалык мучаш марте У Торъял ‒ Масканур корным шотыш кондышаш да Токтарсола ‒ Руш Шуй ‒ Пушкар автомобиль корнышто Шуй эҥер гоч кӱварым ачалышаш улыт.
Л.Камалетдинова
Фотом Марий Элысе Транспорт да корно озанлык министерствын сайтше гыч налме
