Немда эҥер гоч кӱварым уэмдымылан кӧра 26 сентябрь гыч Йошкар-Ола –Вӱрзым кугорнын ик ужашыже (Токтайбеляк деч ончыч 71-ше километрыште) 2025 ий ноябрь марте петырналтме нерген возенна ыле.
Но тыге кудалышташ моткочак йӧндымӧ, сандене шукын вуйым шийыныт, йодмашым возеныт. Тидым шотыш налын, корным петырыме жапым вашталтыме, увертара Марий Элын транспорт да корно озанлык министерствыже. Кугорнын 64-ше гыч 73-шо киломер марте корно кокла 1 ноябрь гыч петырналтеш. Ондак возымына семынак, тудо кӱварым олмыктымо пашам пытарымеш, 2025 ий ноябрь марте, петырыме лиеш.
Йошкар-Ола автовокзал гыч Шернурыш кудалыштше 518-П №-ан автобус Кужэҥер посёлко гоч кудалышташ тӱҥалеш. Расписанийыште изирак вашталтыш лийын кертеш, шижтара транспорт ведомство. Автобус кудалыштме жапым диспетчер службын 30-45-44 телефон ноимер дене рашемдыза.
Лидия СЕМЕНОВА
