Йошкар-Олан историйже тоштерыште Российын почётан доноржо-влаклан удостоверенийым кучыктеныт.
Мероприятий Донорын тӱнямбал кечыж вашеш эртаралтын.
– Эн ответственный да ӱшанле донорна-влакым тиде событий дене куанен саламлена. Нуно мемнан деке ик гана йодмына почешак толыт, илышын шӱртӧ мучаштыже улшо пациент-влаклан вӱрыштым чаманыде пуат, – манеш Вӱрым налме да пуымо республикысе станцийын директоржо Екатерина Зангерова.
Таче республикыштына 3,4 тӱжем утла почётан донор уло, тиде радамыш ынде Дмитрий Дихтяр, Сергей Жуков, Екатерина Малышева, Алексей Мягков, Михаил Анисимов, Дмитрий Колчин да Марат Музафаров ушненыт.
– Те вӱрым веле огыл, шӱм-чондан ужашыжымат пуэда, – почётан знакым кучыктымыж годым манын Марий Эл Тазалык аралтыш министерствын Мер тазалык да медицине профилактике рӱдержын вуйлатышыже Надежда Фролова. – Тендан поро чонда кызыт утарен кодымо еҥ-влакын чоныштыштат ила.
Вӱрым налме да пуымо республикысе станций йоча-влак коклаште Кугу Ачамланде сарыште сеҥымылан 80 ий теммылан пӧлеклалтше сӱрет конкурсым эртарен да тудым тиде кечын иктешлен.
– Ӱдыр-рвезе-шамыч пашашт гоч тунамсе тулан ийласе донор-влакын героизмыштым почын пуэн кертыныт. Нунын кумылым тарватыше сӱретыштым сарын геройжо ден илышым арален кодаш полшышо донор-влакым шарныме порыс семынат аклаш лиеш, – палемда врач-трансфузиолог Елена Шивоева.
Конкурсышто Павел ден Дарья Семякинмыт, Елизавета Казакова, Софья Жевлакова, Самина Рахимова сеҥышыш лектыныт.
Медицине организаций донор-влак коклаштат конкурсым эртарен. Тудо Шочмо элым аралышын идалыкшылан пӧлеклалтын да донор толкынын историйже дене кылдалтын. Йодыш-шамыч куштылгыжак огыл лийыныт… Чыла заданийым эн сайын Денис Семякин шуктен.
Мероприятийым иктешлымек, тоштерын Сарзе чап пӧлкажым вуйлатыше Владимир Корякин экскурсийым эртарен. Тудо Кугу Ачамланде сарыште кредалше землякна-шамыч, Марий республикын Москва, Ленинград да Российын моло олаж гыч эвакуироватлыме еҥ-влакын кокымшо пӧртышкышт савырнымыж нерген оҥайын каласкален.
Вӱрым налме да пуымо станций тыгай шотан мероприятийым Йошкар-Олан историйже тоштерыште икымше гана огыл эртара. Тиде йӧн донор толкыныш у еҥ-влакым ушаш полша да шочмо ола нерген эше шукырак пален налаш кумылым луктеш.
Маргарита ИВАНОВА
Марий Эл Тазалык аралтыш министерствын фотожо
