«Образований» национальный проектын «Кызытсе школ» федерал проектше дене келшышын Волжский район Сотнур школысо «Кушмо точко» тунемме кумдыклан у оборудованийым кондымо.
Тиде – биологий, физике да химий дене цифран кум лабораторий, тыгак нейротехнологий ден физиологий лабораторий-шамыч. Кажныштыже методический пособий уло, тушто практике ла лабораторный пашам эртараш темлымаш-шамычым возымо. У оборудованийже – цифран датчикан программе-аппарат комлекс. Тудо компьютерыш ушалтеш, тыге йоча-влаклан тӱрлӧ шымлымашым эртараш лиеш.
Нейротехнологий дене лабораторий шотышто ойлаш гын, тудын полшымо дене айдемын физиологийже дене кылдалтше шымлымашым ышташ йӧн уло. Мутлан, электрокардиограммым сниматлаш, тыгак вӱршер кырымым, вуйдорыкын пашажым, шӱлышым да молымат тергаш.
Тыгак школлан химий, физике дене ОГЭ-лан наборым, шуко функциян принтерым, цифран кок микроскопым конденыт. Палемдыман, тиде направлений дене келгырак шинчымашым налаш йоча-влакын кумылышт уло. 9-11-ше класслаште биологий-химий курс-влакым эртарат, сандене у оборудований профориентаций пашам сайынрак ворандарен колташ да келгырак шинчымашым пуаш моткоч кӱлешан.
Г.Кожевникова
Фотом Волжский районысо образований пӧлкан сайтше гыч налме
