Кеҥежын шокшо игечыже «Марий чодра» национальный паркыш канаш мийыше-влакым тушто улшо ер вӱдыш пурен лекташ тарата. Тидын годым теве мом шотыш налман. Мутлан, тусо Глухое ерыште посна режимым пуртымо, тудо кугыжанышын аралыме кумдыкыштыжо вераҥын, сандене тушко парк пашаеҥын ужатымыж дене гына логалаш лиеш. Тидын шотышто пунчалым эше 2011 ийыштак национальный паркын научно-технический советше луктын улмаш.
Ерыште да тудын серыштыже ойыртемалтше кушкыл-влак кушкыт, южыштым Российын да Марий Элын Йошкар книгалашкышт пуртымо. Мутлан, йошкар шыркавуй, ошман астрагал, ош кувшинке, вич лышташан люпинке.
Аралыме кумдыкын администрацийжын разрешенийже деч посна пурен коштмаш законым пудыртымашлан шотлалтеш, сандене РФ Административный правам пудыртымаш кодекс почеш мутым кучаш логалеш. Тыглай граждан-влаклан 3 гыч 4 тӱжем теҥге марте штрафым тӱлаш пуэн кертыт, должностной лицалан – 15 гыч 20 тӱжем теҥге марте, а юридический лицалан – 300 гыч 5000 тӱжем теҥге.
«Марий чодра» национальный паркын рекреаций кумдыкышкыжо пураш посна билет лийшаш. Тудым учрежденийын сайтыштыже, тыгак паркын кумдыкыштыжо улшо кугыжаныш инспектор-влак дене але Красногорский посёлкышто верлныше рӱдӧ офисыште ышташ лиеш.
С.Носова
Фотом паркын лаштыкше гыч налме
