18 — 21 июльышто Кирово-Чепецк олаште «Ива дивная» визымше всероссийский фестиваль эртен.
Молгунамсе семынак тушто вӱдуа гыч тодшо кидмастар-влакын конкурсышт, ыштыш-кучыш ончер-ярмиҥга, мастер-класс-влак эртеныт. Вӱдуа гыч тӱрлӧ арверым ыштыме шотышто фестивальыш теният элнан тӱрлӧ регионжо гыч мастар-влак ушненыт, икте-весым паша опыт дене палдареныт.
Марий Эл гыч тушто Оршанке районысо Тошто Крешын гыч Марий Элын калык мастарже Виталий Кудрявцев участвоватлен да конкурсын «Вечные ценности» номинацийыште посна дипломжо дене палемдалтын. Тудо жюрилан аклаш кок маскайолым (снегоступым) ыштен, вет конкурс Кугу Отечественный сарыште Сеҥмылашлан 80 ий теммылан пӧлеклалтын. А сар годым Марий Эл гыч мемнан салтак-шамычлан 16 тӱжем маскайолым ыштен колтеныт улмаш.
Снимкыште: Виталий Кудрявцев — конкурс годым.
Фотом Виталий Кудрявцевын воткыл лаштыкше гыч налме.
