Кодшо кечылаште республикыште Чрезвычайный ситуацийым шижтарыме да кораҥдыме, пожар лӱдыкшыдымылык шотышто Марий Эл правительстве пеленысе комиссийыште шошымсо вӱдшор пагытым аварий деч посна эртарыме шотышто межведомственный пашаче комиссийын заседанийже эртен.
Тушто тачысе гидрометеорологий обстановко да тений вӱдшор лийын кертме нерген йодыш-влакым ончен лектыныт. Тыгак гидротехнический сооружений-влакым олмыктымо, вӱдшорлан кӧра лийын кертше чрезвычайный ситуацийым кораҥдаш Россий МЧС-ын Марий Элысе территориальный управленийжын вийже ден йӧнжым ямдылыме дене кылдалтше йодыш-влакымат рашемденыт.
Кугу тӱткышым муниципальный образованийлаште шошымсо вӱдшор пагытлан ямдылалтмылан ойыреныт. Онлайн режимыште Йошкар-Оласе, Медведево, Юрино, Звенигово районласе администраций вуйлатыше-влакын алмаштышыштым, вӱдшор дене кылдалтше комиссий вуйлатыше-влакым колыштыныт. Тыгак Марий ЦГМС вуйлатышын алмаштышыже, Пӱртӱс поянлык, экологий да йырым-йырысе средам аралыме шотышто министерствын, Россий МЧС-н республикысе управленийжын специалистше-влак выступатленыт.
Нунын палемдымышт почеш, кундемыште вӱдшор пагытым ласкан эртарен колташ чылажат ямде. Муниципал район администраций-влаклан вӱдшор кузе эртыме, туткар годым мом ыштышаш, лӱдыкшым кораҥдаш могай йӧным кучылташ лийме нерген калыклан шижтаренак шогаш темлыме.
Светлана Носова
Авторын фотожо
