Кече утыр да утыр ырыктыме дене лум койын шула. Теве вашке пӱяште ма эҥерлаште вӱд нӧлталтеш, вӱдшор тӱҥалеш.
Вӱдшор пагытым йоча годым чот вучымо. Корем вӱдын ташлен йогымыжым ончаш пакча мучашке лӱмынак куржына ыле. Южгунамже шошо вӱдым келын кошташ, ончен шогымо вер гыч вес могырыш лектын шукташ оҥайын чучын.
Йолташ-влак, вӱдшор пагыт тендам тургыжландара мо? Тудлан кузе ямдылалтыда? Йоча годсо оҥай шарнымашда ала уло?
Инна АЛЕКСЕЕВА, Морко посёлкысо 1-ше №-ан йочасадын воспитательже:
– Вӱдшор пагыт сайын эртыже манын, сурт-пече воктене лумым эреак кышкена, шалатена, тыге тудо писынрак шула. Капка ончылнына мланде ошманрак, сандене тудо кумдык кошкенат шуктен.
Вӱдшор пагыт йоча годым пеш веселан эртен: Ярамарий школыш кум меҥгым йолын коштмо, торешла эҥер ташлен йоген. Утларакше рвезе-влак чояланен, кем тич вӱдым кошталыт да тунемаш огыт кай ыле. Ял уремна мучкат шошо вӱд йоген вола ыле. Тидлан йывыртен, кагаз гыч пушым ыштенна да ӱчашен-ӱчашен модынна. Кызыт тыгай кугу вӱдшор уке гаяк, садлан самырык годсо шарнымаш ушышто кызытат ила.
Надежда ЯНДОВА, Звенигово районысо Какшамарий тӱвыра ден каныме рӱдер вуйлатыше:
– Вӱдшор толмо мыйым чот тургыжландара: пӧртйымаке вӱд пеш пура. Шошо вӱд ӱмаште пӧрт кӱвар марте теве-теве гына шуын огыл. Тений тидын шотышто шоналташат лӱдам, мом вучыман ала? Кызытешлан вӱд изиш веле погынен.
Йоча годым вӱдшор пагыт оҥайын чучын, модын юарлен эртаренна. Йолташ ӱдыр-влак дене школ тура гыч тӱҥалын, лап (ялна кок ужашлан шелалтын: иктыжым лап, а весыжым аркаси манынна) йотке пушым колтен-колтен воленна. Кызыт тыге модшо-шамычым отат уж.
Иван БОГОМОЛОВ, Российысе сӱретче ушемын йыжыҥъеҥже:
– Шошым ояр игече моткоч куандара, вашкерак лум шулен пытымым вучена.
Ола воктене Нолько эҥер кажне шошым ташла. Тыште лап вершӧр, ик тылзе жапыште пӧртйымачын вӱдым насос дене гына колтен утаралтына.
Йоча пагыт гыч шарнем, Советский район Кукмарий ялыште рвезе-шамыч дене уремыште вӱдым пӱялен модынна, арама шӱм гыч ыштыме изи пушым колтедылына ыле. Ятыр гана резинке кем тич вӱдым кошталмеке, содор мӧҥгӧ куржаш пернен.
Вероника КУЗНЕЦОВА, Марий Эл культурын сулло пашаеҥже:
– Йоча пагытем Йошкар-Олаште эртен манаш лиеш: 1-ше №-ан музыкально-художественный школышто тунемме годым снегоходым ончаш Изи Какшан эҥер воктеке куржталынна. Модын юарлыме годым школ воктеч йогышо шошо вӱдыш кагаз гыч ыштыме пушым колтен ӱчашенна.
А кызыт лум шулаш тӱҥалмеке, резинке кемым луктам да лум йӧршан вӱдыштӧ кумылын коштам.
А.БАЙКОВА ямдылен
Авторын фотожо
