Советский районысо Шабашан памаш дене 21 июльышто «Святой родник» духовный муро да поэзий районысо фестиваль эрташ тӱҥалеш.
Йошкар-Ола да Марий архиепископ Иоаннын багословитлымыж почеш тудо 2013 ий гыч эртаралтеш. Кажне ийын лачшымак Юмынаван Казанский юмоҥажын кечынже лиеш, молан манаш гын, ты памашыжымат, 2010 ийыште пашаш колтымо тысе черкыжымат Юмынаван Казанский юмоҥаж лӱмеш освятитлыме. Тиде кечын Юмынавалан пелешташ, юзо виян вӱдыштӧ чывылталташ калык эре шуко толеш. Муро да поэзий фестивалят чоным кандараш полша. А вер-шӧрым тыште чынжымак чоным кандараш полшышын тӱзатен шындыме. Памаш вӱдшӧ шинчам эмлаш полша, маныт калыкыште.
Снимкыште: Шабашан памаш кумдыкышто.
Светлана Носован фотожо
