Вера Горохова, МЭТР телеканалын корреспондентше:
– Моткоч ӱшанем. Изи годсек ты кече дене кылдалтше йӱлам ешыште шуктымым ужын кушкынам. Ошыгечынже йӱла почеш окна, омса янак, эсогыл пӧрт, монча тӱньык ӱмбаке ыресым ыштыме. Мый кызытат тыгак ыштем. Эшежым 19 январьыште ачамын шочмо кечыже, сандене ты кече мыланем кок пачашан пайрем. Эрденак вӱдлан каенна. Памаш вӱдымат налынна, но утларакше кызыт вӱдлан черкыш коштына. А теве йӱштылаш ик ганат пурен омыл, «пӧлем кушкыл» улам да шуйнен возам манын лӱдам.
Ты кечын налме вӱд дене идалык мучко пайдаланена. Тыглай илышыште шагал огыл туманлена, кычкырлена, икманаш языкым ыштена, сандене вӱд чыла осалым эрыкта манын ӱшанемак. Пӧртымат тудын дене эрыктен луктам. Шнуй вӱд денже кажне тылзын тыге эрыктыман маныт. Мый тора корныш коштшо улам, машинамат тыгак эрыктем. Тӱшка калык коклаште пашам ыштымылан кӧра тӱрлыжат вашлиялтеш, негативат шагал огыл погына, садлан концерт але кугу мероприятий деч вара эре юмын вӱд дене шӱргем шӱялтем.
Эдуард Иманаев, Марий книга савыктыш директор:
– Крешене кечым марий калыкыште «Вӱд модмо кече» манме – ойжак кузе моторын йоҥга, кумылым нӧлта, куштылгылыкым пуа, илыш вийым ешара. Кажне ийын черкыште вӱдым налына, тиде кечын але арня коклаште ешге йӱштылына. Марий калыкынат, православий йӱлажат чын илаш туныктымо шот дене шыҥдаралтыныт, сандене икгайлыкшат шуко. Айдеме тукымлан шӱм-чон тазалык, аралтыш семын улыт. Кеч-могай пайремынат, йӱла ойыртемын пайдажым калык шижеш, сандене кучаш, шукташ тырша.
Айдеме шкежат 80 процентше вӱд гыч шога маныт, сандене ме тудын деч посна иленжак огына керт. Крешене пайрем йӱла тидым эше ик гана ушештара, йӱштыл лектын, у вийым налаш кумылым луктеш.
Лариса Петрова, Волжский районысо Упшер йоча сымыктыш школын туныктышыжо:
– Крешене кечысе вӱдын шнуй вийжылан веле огыл, тугакшат вӱдын куатшылан ушанем. Ончыч Пӧтъял черкысе памашыш эре чывылалташ лӱмын коштам ыле, ийгот ешаралтмылан кӧра ала-мо пытартыш ийлаште тидым ыштымым чарненам. Но кеҥежым тушко миен толашак тыршем.
Василий Домрачев, М.Шкетан лӱмеш кугыжаныш национальный драме театрын режиссёржо:
– Ты кечын гына огыл, тугакшак вӱдын вийжыланак ӱшанем. Изинек памашыш коштмо, шӱргым шӱялташ, вӱдым подылаш, пелен налаш. Шке семын кӱлеш пелештыме мутым ойлет. Пошкырт велне гастрольышто монь лийме годым лӱмын памашымат кычалын каена ыле. Ончыч ты кечын йӱштылашат кошталтын, но пытартыш ийлаште чарненам. Памаш вӱдын вийже улак, санденжат пошкудо-шамыч дене пырля шочмо У Торъял районысо Немда эҥер воктенысе Проньган памашым тӱзаташ пижынна. Пуралан пырнямат заказетленам. Волакшым шке кидем дене руэн луктынам.
Александр Абдулов, «Марий Эл» увер агентстве» кугыжаныш автоном учреждений директорын икымше алмаштышыже:
– Мый черкылан кумалше айдеме семын огыл вӱдын вийжылан ӱшанем. Памаш вӱд айдемым чынжымак тазаҥдараен кертеш шонем. Санденак йолташ-влак дене пырля пытартыш кандаш ий наре Ежовысо памашыш чывылталташ коштына. А такшым, чыла гаяк черкым марий-влакын кумалме верыштышт нӧлтеныт. Сандене тусо памаш вӱдыштӧ йӱштылмым языклан ом шотло.
Наталья Пушкина, Марий Эл Кугыжаныш Погынын депутатше:
– Ӱшанем. Икшывым ыштыме марте, Крешене кечын тӱрлӧ памаш вӱдыш йӱштылашат пуренам. Йошкар-Ола воктенысе Кортыштат, Оршанке районысо Табашиныштат, Упшыштат, Морко велнат лийынам. Памаш вӱдыш пурен лектат да чыла осал деч эрыкталтмыла чучеш, куштылгылыкым налат, вий ешаралтеш, у шижмаш шочеш. Но пытартыш ийлаште ты кечын йӱштылмым чарненам. Икшыве шочмо дене шке нерген веле от шоно вет: тудын ончылнат ответственностьым шижат, черланыме деч лӱдат. Крешене кечын налме вӱд дене идалык мучко пайдаланем, пӧртымат эрыктем, чурийвылышымат шӱялтем.
Лилия Рычкова, республикысе Онкологий диспансерын медшӱжарже:
– Крешене кечын черкыште налме вӱд ок локтылалт, ок шопо. Авамат тидлан ӱшана. Йӱштылашыжак ты кечын пурен омыл, но чурийым эре шӱялтем. Авалийшем гын ты кечын тавышкат кӱртньӧ гыч ыштыме юмоҥам волта ыле. Тидын деч вара вӱдшым налын, пӧртыш пуртен.
Вячеслав Мартьянов, Волжский районысо энтузиаст-спортсмен:
– Уке, ом ӱшане.
С.Носова ямдылен
