«МАРИЙ ЭЛ» ТАЧЕ

Вӱд корно почылтын

Марий Элын Спорт да туризм министерствыжын увертарымыж почеш, пӱртӱсыштӧ канаш йӧратыше-влак республикысе эҥерлаште пуш дене ийын кошташ ямде улыт.
А тыге канаш келшен толшо эҥержылан Старожильск посёлко деч тӱҥалын, Чакмарий кӱвар марте Куку Кашан эҥерын, Красногорскысо кӱвар марте Элнет эҥерын да, Куяр посёлко воктенысе Изи Какшан эҥер гыч тӱҥалын, Юл эҥерысе Шулко посёлко марте кумдык-влак. Тыгак турист-влак Ӱшӱт ден Немда эҥерлан йогынжо дене ийын кошташ йӧратат.
Россий МЧС-ын Марий Элысе Тӱҥ управленийжын специалистше-влакын палемдымышт почеш, пуш дене ийын кошташ мемнан эҥерлаште кугу лӱдыкшӧ уке, нунылан неле лийше участке шагал. Лӱдыкшым вӱдыштӧ лектын шогышо вож але йӧрлшӧ пушеҥге-влак гына ыштат.
Ушештарен кодыман: эҥерлаште пуш дене ийын кошташ шонышо тӱшка-влак ончыч Россий МСЧ-н Марий Элысе Тӱҥ управленийыштыже регистрацийым эртышаш улыт. Тидым ведомствын сайтыштыжат ышташ лиеш. Тушто лӱмын ямдылыме формым кучылтман. Вӱд корныш тарваныме деч ончыч кулеш лийше снаряженийымат сайын тергыман да игечымат шотыш налман.
«Марий чодра» национальный парк кумдыкышто ийшашда уло гын, маршрут шотышто администраций дене мутланен келшыман да кӱлеш документым ыштен ямдылыман.
С.Носова
Авторын фотожо

Опубликовать в Одноклассники

Добавить комментарий