Марий Элыште школ лесничестве-влакым ыштымылан 55 ий темын.
Ты лӱмгечыш Юл кундем кугыжаныш технологий университетыште марий чодырам тӱзаташ полшышо самырык тукым дене пашам ыштыше чыла специалист-влак ушненыт.
Мероприятийым Марий Элын Пӱртӱс поянлык, экологий да йырым- йырысе средам аралыме шотышто министерстве эртарен. Министр Алексей Киселёв погынышо-влакым саламлен, республикысе Образований да науко министерствылан, республикысе Йоча эколого-биологический рӱдерлан, Юл кундем кугыжаныш технологий университетлан ӱдыр-рвезе-влакым марий пӱртӱсым йӧраташ кумылаҥден толмыштлан Чап грамотым, тыгак кужу жап самырык лесовод-влак дене пашам ыштымыштлан ветеран-шамычлан Тауштымашым кучыктен.
Тачысе кечылан республикыште 70 школ лесничестве пашам ышта. Тушко 1600 наре икшыве ушнен. Нуно чодыра озанлык паша дене кылдалтше шинчымашым налыт, йырым-йырысе средам шымлат, шукышт ончыкыжым ты отрасльыштак пашам ышташ ямдылалтыт. Южышт варажым Марий чодыра озанлык техникумыш, Юл кундем кугыжаныш технологий университетыш шинчымашым налаш пурат.
Снимкыште: мероприятий годым.
Фотом Марий Эл правительствын официал лаштыкше гыч налме.
