Пензыште Юл кундем федеральный округын законодательже-влакын советыштын 76-шо заседанийышт лийын.
Тушко РФ президентын ПФО-што полномочный представительже Игорь Комаров ушнен. Заседанийыш Марий Эл Кугыжаныш Погын председатель Михаил Васютин миен.
Погынышо-влак Юл кундемысе регионлаште тӱшка спортым вияҥдыме дене кылдалтше йодыш-влакым каҥашеныт. Нунын коклаште:
- Россий Федерацийыште корпоративный спортым вияҥдыме программым писынрак ямдылаш да илышыш пурташ,
- «Земский тренер» пилотный программым кумдаҥдаш,
- адаптивный физический культурым да адаптивный спортым вияҥдаш субъект-влаклан федеральный бюджет гыч субсидийым колташ,
- тунемше ден студент-влак коклаште тӱшка турпоходым илышыш шыҥдараш,
- туныктымо учрежденийлаште кажне кечын эр зарядкым эртараш,
- шуко шочшан, ашнаш налше, окса шотышто нелылыкым шижын илыше ешлаште спорт ямдылалтмаш дене ешартыш шинчымашым налше икшыве-влаклан спорт экипировкым да инвентарьым ойыраш.
Россий правительстве ден Кугыжаныш Думо, регионласе кучем орган-влак лӱмеш нине темлымаш-влакым ПФО-со законодатель-влакын советыштын пунчалышкыже пуртеныт.
76-шо заседанийыштак йоча-влаклан ола воктенысе лагерьлаште канаш да тазалыкыштым пеҥгыдемдаш норматив йӧным саемдышаш нергенат мутланеныт.
Игорь Комаровын палдарымыж почеш, Юл кундем федеральный округышто тений кеҥеж каникул жапыште 1 миллионат 300 тӱжем йоча лагерьлаште канышаш. Тыгодым нунын лӱдыкшыдымылыкыштлан посна тӱткыш ойыралтшаш.
Заседанийыште Россий Федерацийын правительствыжлан йоча лагерьлашке налме путевкын 50 % марте акшым ача-ава-влаклан федеральный бюджет кӱшеш пӧртылтышаш, каныме верлаште илыме корпуслам уэмден тӧрлатышаш да капитально олмыктышаш нерген программым приниматлаш темлымаш-влакым советын иктешлыше решенийышкыже пуртеныт.
Кугыжаныш Погын председатель Михаил Васютин заседанийын пашажым иктешлышыжла палемден:
– Юл кундем федеральный округын законодательже-влакын советыштын заседанийыштыже чыла регионышто моткоч пӱсӧ улшо йодыш-влакым каҥашыме. Спорт объектлаште оласе калыкын веле огыл, яллаште илыше-шамычынат йӧнышт лийшаш. Тидын шотышто Марий Элыште паша чолган шукталтеш: спорт инфраструктур райрӱдылаште, школ пеленысе кумдыклаште да кудывечылаште умбакыже вияҥдалтеш. Инвалид да изи пашадаран еш-влакланат спорт дене кылым кучаш икгай йӧным ыштыман. Коллеге-влак дене спортын национальный видше-влакым вияҥдышашлан кугу тӱткышым ойыренна. Ончыкыжым нуным вияҥдаш единый манме стратегийым палемдышашлан мый тӱрыс радамыштым ямдылаш темленам.
Ола воктенысе тазалыкым пеҥгыдемдыме йоча лагерь-влакын пашам ыштымышт шотышто ойлаш гын, мыйын шонымаште, у лагерь-влакым почаш бизнес инвестицийым пышташ кумылаҥдаш норматив да правовой акт-влакым ямдылыман. Йоча канышым вияҥдаш оксам ойырышо организаций-влаклан налог льготым да субсидийым палемдыман.
Любовь Камалетдинова.
Пенза областьын Законодательный Собранийжын сайтше гыч налме фото.
