Марий Эл вуйлатыше Юрий Зайцев Йӱдым эртарыме пӧртын у отделенийжын оралтыжым ончен лектын.
Неле илыш ситуацийыш логалше-влаклан кызытеш лач тушто гына кӱлеш
социальный полышым пуат. Тиде учрежденийыште шокшо кочкышым пукшат,
йӱдым эртараш йӧным ыштат. Тыште тыгак диспансеризацийым, медико-
социальный экспертизым эрташ полшат, эмлалтме
учрежденийлашке намиен коштыктат. Нине еҥ-влаклан паша верым муын
пуымо дене кылдалтше йодышымат рашемдат.
Ты пӧртын мобильный бригадыже идалыкын йӱштӧ пагытыштыже
Йошкар-Оласе уремлаште кажне кечын 30 наре еҥым пукша. Идалык жапыште
учреждений 200 утла еҥлан полышым пуа.
«Пробаций нерген» федеральный законым илышыш пуртымо дене
келшышын, тиде пӧрт пелен социальный унагудым да писын пуышаш
социальный полыш ден адаптаций отделенийым почаш палемдалтеш. Тыгай
вашталтышым пуртымеке, неле илыш ситуацийыш логалше-влак фельдшерын,
психологын, социальный педагогын, паша да адаптивный физкультур шотышто
инструкторын полышыштым налын кертыт. «Социальный унагудо»
отделенийыште 50 еҥым 180 кечылан илаш пурташ да шокшо кочкышым
пукшаш йӧн лиеш.
Ӱмаште кугыжаныш программе почеш республикысе бюджет кӱшеш зданийым капитально олмыктеныт. Тидлан 27,5 млн. теҥге ойыралтын.
– Ик жап илаш да уэш нормальный илышыш пӧртылаш тыште келшыше
условий ышталтын, – ончен коштмыж годым палемден Юрий Зайцев.
Социальный унагудым да писын пуышаш социальный полыш ден
адаптаций отделенийым почаш пӧлем-влак ямде улыт.
Марий Эл вуйлатышын пресс-службыжын уверже негызеш Любовь
Камалетдинова ямдылен.
