Михаил Скобелев
Усталык шӱлышан кок еш
Республикысе сӱрет сымыктыш тоштерыште Нижний Новгород ола гыч усталык шӱлышан кок ешын – Поляковмытын да Вагинмытын – «Нижний – Ближний» лӱман ончерже почылтын.
Марина ден Михаил Поляковмыт шке жапыштыже Владимир оласе кугыжаныш педагогический институтын художественно-графический факультетыштыже тунемыныт. Михаил Дзержинск ола гыч, а Марина – мемнан Йошкар-Ола гыч. 1990 ийыште ешым чумыреныт. Вате-марий улмышт усталык ушемыштлан нимынярат чаракым огеш ыште, мӧҥгешла, икте-весылан нуно пеҥгыде эҥертыш улыт, но, мутат уке, кажныжын живопись жанрыште – шке стильже да почеркше. Михаил ӱян чия дене сӱретлыме портретым да оласе пейзажым шочыкташ кумылан. Йӧратыме теме-влак кокла гыч иктыже – оласе панораме-влак. Тушто йырым-йырысе пӱртӱсын «кумылжо», «шӱлышыжӧ» дене пырля моторлыкшо поснак кумдан почылтеш. А Маринан сӱретше-шамыч знак, линий да тӱслан поян. Тиде направленийым тудо «эмоциональный декоративизм» манме семын умылтара. Маринан мутшо почеш, тыгай усталык шӱлышым тудлан Российнан калык искусствыжо пуа.
Ончерым чумырымаште надырым пыштыше кокымшо ешыже – керамист-влак Елена ден Вадим Вагинмыт. Нуно мемнам шун да тул полшымо дене шочыктымо тӱняшкышт ӱжыт. Шунжо кидыштышт пуйто, чынжымак, чонаныш савырна манаш гына кодеш.
Елена Волгоград олашште шочын, шке жапыштыже М.Шолохов лӱмеш Москвасе педагогический институтым тунем пытарен, 2005 ий гыч Россий художник-влак ушемын еҥже. 1989 ийыште тудо керамике дене «СИРИН» образцовый мастерскойым почын да кызыт марте вуйлата. Керамике искусствын йӱлаже-шамыч тукым гыч тукымыш аралалтше манын, Елена ты мастарлыклан туныкта. Вадим пелашыже Горький ола гыч, В.П.Чкалов лӱмеш Горькийысе инженерно-строительный институтышто «Архитектура» специальностьым налын. 2018 ий гыч «СИРИН» мастерскойышто керамике дене преподавательлан тырша. Вате-марий уло кумылын моштымашыштым да паша опытыштым ончыктат, уым шонен луктыт, тыгак тиде юзо шӱлышан искусствылан туныктат.
Авторын фотожо
