Морко районлакн – 100 ий
ИП Кочергина Т.Ф.
«Ургаш шинчамат, кумыл нӧлталтеш»
Латкандаш ий олаште илаш да ял кундемыш пӧртылаш – шагалже тыге ыштен кертеш, а тудо кертын. Йошкар-Олаште пашам еҥлан ыштен гын, шочмо Морко посёлкыштыжо шкаланже тӱҥалаш чолгалыкым муын. Да ынде иктешыже кумло ий ты сомылым шукта.
А опытшым тудо олаштак поген – куэмым шулашат, ургашат тунемын. Сандене район рӱдыш пӧртылмеке, вес паша нерген йодыш лектынжат огыл. Тусо паша вер рӱдерын полышымыж дене Татьяна Фёдоровна Кочергина «Лилия» торгайыме рӱдерыште изи ательем почын, индивидуальный предприниматель лийын.
Тӱҥалтыште шкетын ыштен: тошто вургемым тӧрлатылын, уым урген. Вара шторым ыштымашке куснаш шонен пыштен. Но чыла тидым шкетын шуктен кертын огыл, сандене паша вер рӱдер гочак кум еҥым пашаш налын. Ешартыш паша верым почмылан пуымо полыш окса ургымо машинам ешарен налаш лач веле лийын. Тунам сомыл палынак воранен каен. Тидлан кӧрат 2013 ийыште предприниматель конкурсышто «Идалыкын ӱдырамаш директоржо» номинацийыште кокымшо верым налын.
– Республик кӱкшытан конкурсышто моло предприниматель дене шинчаваш кутырымыжак мом шога. Нунын опытышт дене палыме лият, шкендын дене таҥастарет. Умылет: пеш почешыжак от код. Да утларак тыршаш кумылет лектеш, – ойла Татьяна Фёдоровна.
Но кризис пагыт тудымат тӱкыде коден огыл. Ургызо-влак, договор почеш ик ий ыштымеке, паша гыч каеныт. Уло нелыт шке вачӱмбакше возын. Но тудо чакнен огыл – ончычсо семынак шкеак куэмым шулын, шкеак урген. Заказ шуко улмо шыгыр жапыште канышымат монден… Туге гынат шкетын шукташ неле лийын, да уэш паша вер рӱдерлан эҥерташ логалын – у пашаеҥым налын. Санденак районысо ты рӱдерлан тауштыдежат ок керт: ик гана веле огыл тудо неле пагытыште полшен.
Кызыт тушто, «Стиль» штор ательеште, вуйлатышыге визытын ыштат. Дизайнер пашалан кугу тӱткышым ойыраш тӱҥалмышт деч вара заказым ыштыме салоным палынак кумдаҥденыт. Корно гоч «Карина» торгайыме рӱдерыш куснымышт тидлан йӧным пуэн. Тыге портьер ден гардине куэм могай улмым сакен ончыкташат вер лектын.
— Ме кызыт блэкаут да бархат гай у материалымат кондена. Тидыжат заказым кумдаҥдаш полшен. Ламбрекеным, тюльым, шторым ургыктена. Илыме, кочмо да малыме верлам веле огыл, кафе ден унагудылам, тунемме ден тӱвыра учрежденийлам шкенан ургыктымо сатуна дене сӧрастарена. Мебель куэмнат шуко, вет ме эше диванлан, креслылан да пӱкенлан ӱмбач чиктышым ургыкташ тӱҥалынна, — каласыш ательен озаже.
Тысе пашаеҥ-влак чылан гаяк дизайнер улыт, заказым ыштыше деке лӱмын вискалашат мият. Куэмымат, ойырен налаш куштылгырак лийже манын, иканаште икмыняр тӱрлӧ пӱчкышым ончалаш намият. Карнизыштат тӱрлӧ уло – келшышым ойыраш полшат. А вара, куэмым кӱлеш наре пӱчмеке, ургаш колтат.
Кызыт тыште шке огыт урго. Озашт олаште опытан ныл ургызо дене кутырен келшен, паша вер шотеш пӧлемымат кычал муын. Нуно куэмым шкештак шулыт, шкештак ургат. Куштылго илышлан кӧра огыл тудо тыгай корным ойырен налын. Вет жапше годым ургызым муын кертдымылан кӧра нелылыкымат чытен. Шушаш жапыште ассортиментым кугемдынеже гын, ургызымат ешарен налаш шона.
– Мый шкежат коклан ургымо машине воктеке шичде ом чыте. Тынар ий ыштен тунемме сомыллан пижамат, кумыл нӧлталтеш. Санденак ик машиным тыште паша кӱлешлыклан кодымо, – каласыш Татьяна Фёдоровна да тудым ниялтен колтыде ыш турко.
Юрий ИСАКОВ
Снимкылаште: амалкалче Т.Кочергина; дизайнер В.Иванова куэмым виса; «Карина» торгайыме рӱдер.
Авторын фотожо.
