Урал кундем марий-влак деч поэт да киноартист Йыван Кырлан шочмо верышкыже, Шернур район Купсола ялыш, кугу кӱ толын шуын.
Ты пӧлекым шернур калыклан Свердловск область Сарсаде ял гыч тусо чолга меръеҥ Леонид Канакаев ден мурызо Эльвира Трифонова шке машинашкышт прицепым пижыктен конденыт. Тидын нерген соцкыл лаштыкыштыже поэтессе Зоя Дудина увертара.
«Кӱм колтышо да тышке кондышо-влаклан мланде марте вуйнам савена. Ты кӱн чонжо уло гын, тудо мемнан землякна Йыван Кырлан чонжым арала»!» – серен Зоя Михайловна.
Ушештарен кодыман, очыни, Марий Элын калык писательже Зоя Дудина Йыван Кырлан шочмо кундемжым чапландарыме дене кылдалтше кугу пашам ворандара. 2021 ийыште тудо «Кырланур – луй модмо вер» лӱман проектым ямдылен да илышыш шындараш пижын. Проектым ял калыкат, Марисола ял шотан илем администрацият, районысо кучемжат сайлан шотленыт. Тудын кышкарыште Купсолаште 2029 ийлан Йыван Кырла лӱмеш историй да тӱвыра рӱдер лийын шушаш. Тыгак ялым тӱзатат, турист-шамычлан келшышым ыштат. Ты шотыштак «Кырланур» турист маршрутым почшаш улыт. Тудо Йошкар-Оласе кӱртньыгорно вокзал воктеч, Йыван Кырлалан шогалтыме шарныктыш деч, тӱҥалеш да поэтын пӱрымашыж дене кылдалтше оласе икмыняр объектым, Шернур тоштер-ончер комплексым, Купсола ялым, Марисола школ тоштерым авалта.
Купсолаштыже 2009 ийыште актёрын шочмо пӧртшӧ ваштареш шарныктыш кӱмат пыштеныт. Проект кышкарыштак Йыван Кырлалан пӧлеклалтше тоштер пӧртымат почнешт.
Кӱм лачшымак Свердловск кундем гыч кондымын амалжымат умылтарен кодаш уто огыл, очыни. 1942 ийыште шыжым Кырлам Волжский этап корно дене Свердловский областьысе Краснотурьинск олаш наҥгаеныт да 10 сентябрь гыч Богословский исправительно-трудовой лагерьыш вераҥденыт улмаш. Тушанак Кырлан ӱмыржӧ 1943 ий июль тӱҥалтыште кӱрылтын.
Снимкыште: Урал кундем гыч кондымо кӱ
С.Носова
З.Дудинан фотожо
