Юрий Зайцев муниципалитет-влаклан пожар ваштареш кучедалме профилактике пашам вияҥдаш кӱштен.
Чрезвычайный ситуацийым, пожар лийын кертме лӱдыкшым шижтарыме да кораҥдыме шотышто Марий Эл правительстве пеленысе комиссийын заседанийыштыже лач тидын нерген мутланеныт. Тушто 2024 ийысе пашам иктешленыт да тений ыштышашым рашемденыт.
Кодшо ийыште республикыште чрезвычайный ситуаций лийын огыл. 986 пожар тӱҥ шотышто посна илыме пӧртлаште ылыжын.
– 2024 ийыште пожарымм кораҥден толмо шотышто пашам сайын ыштыме. Но у тургым жап толеш. Эн кугу тӱткышым лӱдыкшыдымылыклан ойырыман, – каласен Юрий Зайцев.
Палемдымыж почеш, 2024 ийыште пожар ваштареш кучедалме материально-техничиский базым 5 автомашина, 4 спецтехнике, 2 аэропуш да утарыше ик катер дене пойдарыме. Тидлан республикын бюджетше гыч 82 миллион теҥге ойыралтын.
Кугыжаныш кучем орган-влак системын пашаштыже кугу вер граждан-влакын аралалтмашлан ойыралтын: тиде – пилотдымо юж судно-влакын керылт кертме лӱдыкшӧ лекме годым калыклан аралыме сооруженийлаш шылаш лийме нерген ончылгоч шижтарыме йодыш.
«Республикын территориальный подсистемыжын пашажым иктешлыме почеш, тӱҥ мероприятий-влакым граждан обороно областьыште, пожар лийын керме да чрезвычайный ситуацийым шижтарыме да кораҥдыме, тыгак вӱд объектлаште лӱдыкшдымылык шотышто эртарыме», – палемден регион вуйлатыше.
Юрий Зайцев пожарно-утарыше спорт дене Россий МЧС-ын тений кеҥежымсе чемпионатыштыже сеҥымылан наградым кучыктен. Тудын ойлымыж почеш, республикыште эртыше тыгай таҥасымаште икымше гана Россий кӱкшытан кум рекорд иканаште шындалтын.
Марий Эл Республикым вуйлатышын пресс-службыжын уверже негызеш Светлана Носова ямдылен.
