«Умбалне Элнет ӱмбал канде»
30 июльышто «Чоткар патыр» тӱвыра да историй комплексыште Марий Элын сулло журналистше Раисия Даниловам шарныме лӱмеш муро фестиваль эртыш.
Шарнымаш пайремыш калык моткоч шуко погынен. Раисия Михайловнам пагалыше, тудын дене пашам ыштыше, гастрольыш коштшо артист, ансамбль-влакат кумылын толыныт. Пайрем кумылым пуртышо тӱрлӧ муро сем южышто йоҥген. Мероприятийыш толшо уна-шамычлан тидыже тыгак икте-весым ужын кутыралташат пеш сай йӧн лийын. Игечыжат лӱмын ыштыме семынак сай шоген. Кӱшыч чевер кече шыргыжын гын, жапын-жапын леве мардежат вӱчкалатен.
Ты фестиваль нерген кумданрак «Марий Эл» газетын лишыл номерыштыже палдарена.
Е.Эшкинина.
