Шернур район Купран тӱҥ школлан – 130 ий
Виче кугыжаныш архивын данныйже почеш, 1894 ийыште Купран ялыште миссионер школ почылтын. Тушто 39 рвезе тунемын, ӱдыр-влакым налын огытыл. Туныктышылан священник Тимофей Семёнович Семенов (тудо Юмын законым туныктен) да псаломщикын эргыже Николай Серафимович Двинянинов ыштеныт. 1904 ийыште Стефановский пу черкым да миссионер школын у оралтыжым чоҥеныт. Тушко 40 йоча – 38 рвезе да 2 марий ӱдыр – коштын.
1920 ийыште 84 марий икшыве шинчымашым налын. Пионер отряд-влакым чумыраш тӱҥалыныт. Туныктышылан А.Н.Красильников, С.Ф.Дубровина ыштеныт.
1938 ийыште шымияш школыш, но Кугу Ачамланде сар жапыште уэш тӱҥалтышыш савырнен. 1941 ийыште икымше выпуск лийын, 4-ше классым 32 ученик пытарен, кумытын гына (И.В.Богданов, А.И.Акланов да В.П.Пахтыбаев) Кугу Коклала школыш вонченыт.
Тӱҥалтыш класслаште Н.И.Масленникова, А.Ф.Яметова, Е.А.Исаева туныктеныт. Йоча-влак кеҥежым «У корно», «Мӱкш» колхоз пасулаште тыршеныт.
Сар деч вара 1946-47 ийлаште тӱҥалтыш школ пелен кастене туныктыман школым почыныт, директорлан И.В.Богданов ыштен.
1951-52 тунемме ийлан шымияш школым почыныт, директорлан А.Ф.Кульшетовам шогалтеныт.
1953 ийыште черке оралтым олмыктымек (тудым 1904 ийыште чоҥымо улмаш), школым тушко кусареныт. 1962 гыч 1988 ий марте школ кандашияш, вара тичмаш огыл кыдалаш лийын, а 1998 ий гыч тӱҥ общеобразовательный школлан шотлалтеш. 1990 ий гыч тӱҥалтыш класслаште ныл ий туныкташ тӱҥалыныт.
Тӱрлӧ ийлаште директорлан ыштеныт:
Анна Фёдоровна Кульшетова (1951 -1953)
Иван Васильевич Богданов (1953 -1964)
Вячеслав Петрович Пахтыбаев
Юлия Михайловна Тупанова
Виталий Семёнович Константинов
Валентин Григорьевич Созонов (1972 — 1981)
Владислав Шуматович Конышев (1981 — 1982)
Валерий Павлович Ягодаров (1982 -1987)
Валентина Михайловна Булыгина (1987-2012)
Нина Витальевна Малинина (2012- 2017).
Тачысе кечын Купран тӱҥалтыш школышто 50 йоча тунемеш. Директор – Татьяна Рудольфовна Булыгина. Теҥгече Купан школлан 130 ий темме лӱмеш пайрем эртен.
Лидия СЕМЕНОВА ямдылен
Фотом Купран школын архивше гыч налме
