Россий парламентын ӱлыл палатыштыже ялысе туризм теме дене йыргешке ӱстел йыр мутланеныт.
«Ялысе туризм да кумдыклам вияҥдымаш: полшымо законодательстве ден механизм-влакым уэмдымаш» темым Кугыжаныш Думын аграрный йодыш шотышто комитетше тарватен.
Заседанийыште Марий Эл Кугыжаныш Погынын депутатше – тӱвыра, туризм да спорт шотышто комитетын председательже Эдуард Александров ден агропромышленный комплексым вияҥдыме, экологий да пӱртӱс дене пайдаланыме шотышто комитетын еҥже Сергей Ильин лийыныт.
Парламентарий, кугыжаныш органлан представительже да регионлаште ялысе туризм аланыште тӱрлӧ проектым илышыш пуртышо амалкалче-влак туризмын тиде направленийжым вияҥдыме, тудлан полшымо законодательствым саемдыме нерген мутланеныт, каныме объектым ола деч палынак ӧрдыжтӧ ыштыме икмыняр сай практике дене палыме лийыныт, тыгак верлаште ялысе туризмым вияҥдаш тарваныше аграрий-влакын йодышлаштым лончыленыт.
Ялысе туризмым вияҥдаш йӧн уке огыл: чыла субъектысе яллаште уло мом ончыкташ да мо дене ӧрыктараш, палемденыт заседанийыште. Верласе продуктым темлыме да регионласе бренд-влакым кумдаҥдыме нерген ойленыт. Кок умылымашым: агротуризм ден ялысе туризмым – ойырымо шотышто темлымашым колыштыныт. Отрасльлан кадрым ямдылаш кӱлмым палемденыт.
Кызытсе законодательствыш пуртымо тӧрлатымаш-влак ялозанлыклан палемдалтше мланде участкым вес категорийыш кусарыме, чодыра кумдыкым рекреацийлан кучылтмо, ялозанлык продукцийлан шотлалтше сатун радамжым кумдаҥдыме дене кылдалтше положенийлам йодыт.
Российыште ялысе туризм чотшак виян огыл, сандене тиде йогыныш икымше гана ушнышо-влаклан йол ӱмбак шогалше амалкалче-шамычын ой-каҥашышт полшен кертеш. Тидын шотышто бизнесмен-аграрий-влаклан методологический негызым ыштыме, кызыт илышыш пурталтше проект-шамычлан увер дене полшымо, сайын вияҥше озанлыклаште опытым погымо шот дене вашлиймашлам эртарыме, тыгак нелылыкым рашемдыме да тудым кораҥдыме нерген радамын ойлымо. Тыште Сергей Ильин, мландылан да тудым тӱзатыме пашалан акын кугеммыжым шотыш налын, ялысе туризмым вияҥдаш грантын суммыжым кок пачаш кугемдаш темлен.
Маргарита ИВАНОВА
Марий Эл Кугыжаныш Погынын пресс-службыжын фотожо
