Йошкар-Оласе марий мер ушем активын еҥже-влак Йошкар-Ола администрацийын специалистше-влак дене вашлийыныт. Россий президент В.Путинын темлымыж почеш илышыш шыҥдаралтше «Оласе средам йӧнаным ыштымаш» проект почеш Марий паркын кокымшо йыжыҥыштыже могай сомыл ыштышашым каҥашеныт. Парк кумдыкышто чоҥымо паша мучашлалтын манаш лиеш, ынде тудын кӧргыжым проект дене келшышын тӱзатыман.
Кӧ эскерен шога, пала: парк кӧргыштӧ республикысе 14 муниципал образованийлан да 3 олалан посна вер ойыралтеш. «Нуным ме «марий» алфавит почеш вераҥденна», – умылтарыш ушем вуйлатыше В.Мочаев да тыге радамлыш: Йӱрнӹ (Юрино) – Кожламары (Килемар) – Кырыкмары – Марий Тӱрек – Масканур (Медведево) – Морко – Оршанке – Параньга – Провой (Звенигово) – У Торъял – Шернур – Юлсер (Волжский). Нуно марла-рушла возалтыт, ола-влакын лӱмышт рушла кодыт. Ятыр жап каҥашымек, Йошкар-Олалан верым эн ончылно, пурымаште, ойыраш мутланен келшышт.
Парк шошым вӱд шарлыме кумдыкышто шинча, «Архитектор» ООО-н директоржо А.Дождиковын мутшо почеш, тыште капитальный чоҥымаш пашам ышташ чарыме. Сандене тӱҥалтыште палемдыме уна кудо олмеш кугу пайремла годым, пошкудо татар-влакын примерыштым налын, шатёрым шупшаш темлымаш лие.
Чарналтыш шотышто администрацийын транспорт пӧлкажын вуйлатышыже А.Дроздов тыгай уверым пуыш: Ленин проспектыште «Тазалык аллей» чарналтыш лӱмым лишыл жапыште «Марий парк» манын возымылан вашталтат.
Администрацийын экологий пӧлкажын специалистше-влак паркым чоҥымо годым таза пушеҥге-влакым арален коденыт. Туге гынат, эше шуко шындыман, парк йыр ужар пушеҥге ден вондерла лийшаш улыт. В.Мочаев, мутлан, кажне район гыч «шкеныштын» пушеҥгым конден шындаш темла. Шошым, йолташ-влак, кугу паша вуча,
Тӱвыра управленийын начальникше Н.Логинован ойлымыж почеш, Йошкар-Олалан 440 ий темме вашеш «Марий Град» обществе (вуйлатыше – Н.Иванков) кидмастар-влак коклаште «Легенды народа мари» конкурсым эртара. Нунын ыштыме пу скульптурышт парк кӧргым эшеат пойдарат.
Ленин проспект велым пурымаштак йоча модмо площадке, кинотеатр, каналтен-мутланен шинчыме вер, лӱҥгалтыш лийыт. Икманаш, каҥашымаште нимо ӧрдыжеш ыш код, чыла кырча-марчажымат манме гай рашемдышт.
Содыки Марий парк тений Пеледыш пайремлан (тудым 16 июньышто эртараш палемдыме) ямде лиеш мо? Ӱмаштат тыгай мут шарлыш, но калыкым ондалмыла лие. Тиде йодыш йыр ятыр ой-каҥаш, темлымаш йоҥгалтыч, но кызытеш ик ойыш толын ышт шу.
– Чылажат подрядчикын пашам кузе виктарен колтымо дене кылдалтын. Вес арнян ме нунын дене вашлийшаш улына. Шонена, чылажат сай лиеш, – иктешлен мане совещанийын пашашкыже ушнышо мэр Евгений Маслов.
Йошкар-Ола мер ушем велым председательын алмаштышыже М.Почтенева, активын еҥже-влак: Р.Катаева, А.Кленов, В.Созонов, Г.Ласточкина, Ю.Тушнурцев, В. Ершов, М.Крылов – лийыныт.
Л.СЕМЕНОВА
