Кажне ийын шошын кокымшо тылзынже рӱдолаштына шкешотан «тургым»: черетан тунемме идалыклан общеобразовательный организацийласе икымше класслаш йоча-влакым погат. Ӱмаште Йошкар-Олаште 31 тӧнеж тыгай йодмашым налын гын, тений нунын радамыш эше ик тунемме вер ушнен, тиде – «Восточный» микрорайонышто чоҥалтше 32-шо №-ан у школ. Кызыт тудын кӧргыжым шотыш кондат: класслаште, коридорлаште, спортзалыште чиялтыме да штукатуркым пыштыме сомыл шукталтеш.
Тидыжым эртыше кушкыжмын шке шинча денак ужна. Ужнаже ӧрдыж гыч веле огыл, а Марий Эл Кугыжаныш Погынын депутатше Наталья Пушкина дене пырля тудын кажне ныл пачашыжым ончен савырнышна. Чыла вережат тӱрлӧ организацийла гыч пашаеҥ-влак тыршат да школлан, проект дене келшышын, тӱсым пуртат. Икымше пачашыште – кумда да йоҥгыдо столовый, кокымшышто – тӱҥалтыш класс-влак шинчымашым погаш тӱҥалыт, кумшышто – 7-9-ше класс-влак, а эн кӱшнӧ – эн кугу ийготан-шамыч. Кажнын – шке тӱсшӧ, а эн тӱҥжӧ да ойыртемалтшыже — шке тематикыже лиеш. Икымшым Йошкар-Олалан пӧлеклаш палемдыме, кокымшым – марий культур да искусствын деятельже-влаклан, кумшышто тунемше-шамыч шочмо кундемыштын кушто верланымыжым да пӱртӱс поянлыкшым пален налын кертыт, а нылымше марий учёныйна-влакын сеҥымашыштым ончыкташ тӱҥалеш. Икманаш, чылажат марий калыкнан илышыже дене кылдалтше лиеш. Но тиде кызытеш эше огеш палдырне, чылажат – штукатуркым пыштыме деч вара. Тунам дизайнер-шамыч тыршаш тӱҥалыт, ты жапыштак мебельым налме да вераҥдыме дене кылдалтше сомылым ворандарен колтыман.
— Отделке паша май марте мучашлалтшаш, а школ 1 августлан ямде лийшаш да 1 сентябрьлан почылтшаш, — каласыш чоҥымо виктемын тӱҥ инженерже Эдуард Черненко.
Школ — кугу, волгыдо. Тыште чылаже 1180 йоча тунемын кертеш.
Проект шотышто Наталья Васильевна тыге вашештыш:
– Чыла тиде – Образований да науко министерстве, Йошкар-Оласе образований виктемын инициативе тӱшкажын пашаже. У тунемме верлан проектым ямдылымаште регионысо образований да науко министр Лариса Ревуцкаян вуйлатымыж почеш тыршеныт.
Тиде кечылаштак чоҥалтше объектыште рӱдолан мэрже Евгений Маслов лийын, ыштышаш пашам палемден.
– Йошкар-Олаште школ-влак огыт сите, сандене ты тунемме тӧнеж моткочак кӱлеш. Регионым вуйлатыше тудым тений 1 сентябрьыште почаш задачым шынден. Чыла паша график почеш ышталтеш, эсогыл – ончычрак. Объектым финансироватлыме сомылат шке радамже дене шукталтеш, – каласен тудо.
Тунемме вер воктенысе кумдык нерген ойлаш гын, тудын ончылныжо, уремыште, амфитеатр (покшелне – сцене, а йырже – икмыняр ярусан шинчыме вер) лиеш. Лач тушто тӱрлӧ торжественный мероприятий-влак эртаралташ тӱҥалыт. Тыгай кугу да моло деч палынак ойыртемалтше школ Марий Элыштына – икымше да, тудо, мыйын шонымаште, кеч-могай йочам шинчымашым налаш кумылаҥдаш тӱҥалеш, а туныктышо-шамычым – уло кумылын туныкташ. Пагалыме педагог-влак, кумылда уло – пашаш толза!
Г.Кожевникова
М.Скобелевын фотожо
