«Новая Звезда-2022» музыкальный проектыште Марий Элын чапшым ты гана Лаура Дурсунова арала.
Россий Обороно министерствын полшымыж дене «Звезда» телеканал конкурсын съёмкыжым тӱҥалын. Ты проектыш Российын 85 субъектше гыч талантан-влак ушненыт.
Конкурс нунын кокла гыч эн-энжым ойыраш да муро гоч кажне регионын моторлыкшым, ойыртемжым ончыкташ полша.
Лаура Волжск ола гыч. Тудо Озаҥ оласе социально-гуманитарный техникумышто юристлан тунемеш. Ӱдыр изинекак мураш йӧрата. Ты направлений дене шинчымашым налын огыл, шке гыч мураш тунемеш.
– Конкурсыш ушнаш авам темлен, сандене мастарлыкем терген ончаш лийым, – палемдыш Лаура. – Кертмем семын республикнан чапшым кӱшнӧ кучаш тӱҥалам манын шонем.
Программын икымше эфирже лекмеке, телевизорым ончышо-влак СМС-йӱклымаш дене землякыштлан сеҥышыш лекташ полшен кертыт, вет сеҥышыш посна вокалист але дуэт, группо веле огыл, а тудын регионжо лектеш.
Эфир ден йӱклымаш 9 апрель гыч кажне арнян эрташ тӱҥалыт.
А.Байкова
Фотом культур министерствын сайтше гыч налме
