Марий Элыште туризмым вияҥдыме проект-влакым илышыш пуртат.
Республик вуйлатыше Юрий Зайцевлан кундемыштына тиде сферым вияҥдыме шотышто мастер-планым ончыктеныт. Тушко 130 проект пурталтын. Нунын дене келшышын, икшыве дене пырля еш канышланат тӱткыш ойыралтын.
Тыгак ончыкыжым Изи Какшан эҥер серым тӱзатат, Воскресенский проспектым уэмден тӧрлатат, Йошкар-Олаште «Республик – миниатюрышто» парк-тоштерым ыштат, Медведево ипподромым, Чуркан ер воктене каныме базым вияҥдат.
Республикын касвел ужашыштыже Козьмодемьянск олам кокымшо кугу туристический рӱдерыш савыраш палемдалтеш. Тиде амал дене рӱдӧ ужашыжым, Юл эҥер серым, Шереметевысе паркым тӱзатат, «Юрино» да «Базарная площадь» турист рӱдерлам почыт.
Мастер-планым илышыш пуртымо турист-шамычым мемнан деке толаш утларак кумылаҥдаш веле огыл полша, тыгак 1,6 тӱжем ешартыш паша вер лектеш. Тидыже регионлан экономически вияҥашыжат йӧным пуа.
– Кызытеш мастер-план – тиде концепций, сандене ончылно кугу паша вуча. Ты документ дене ончыкылык инвестор-влакым палдарыман, пайдам налын кертшашыштым умылтарыман, – каласен Юрий Зайцев.
Республик вуйлатыше Марий Элын турист-влакым шукырак конден кертше вий-куатше кугу улмым палемден. Тыгак Москва деч 700 километр тораште веле верланымыжым, кундемна гоч Юл эҥерын йоген эртымыжым, Шереметевын замокшо гай исторический вер-влак улмо нерген ушештарен да тидыже регионын инвестицийлан сай йӧным ыштымыж нерген ойлен. Юрий Зайцевын мутшо почеш, мастер-планым илышыш пуртымо годым частный инвестор-влакым утларак кумылаҥдаш тыршыман, тыгодым кугыжаныш программе ден национальный проект-влакымат шотыш налман.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен
