МЕДИЦИНЕ

У оралтыште йӧнжат шукырак лиеш

Республикысе йоча клинический больницын чоҥалтше инфекционный корпусыштыжо монолит пашам кумшо пачаш марте шуктымо.

Чоҥышо-шамыч тӱҥ монолит пашам март-апрельыште мучашлаш да вара кыдежлам нӧлташ, коммуникацийым шупшаш тӱҥалаш палемдат.

Тиде объектын пашам ышташ тӱҥалмыж дене республикыштына инфекциян чер дене орланыше йоча-влаклан специализироватлыме медицине полышым стационарыште централизованно пуаш йӧн лиеш.

Таче регионысо йоча инфекций службын материальный базыже кызытсе йодмаш-влакым ок шукто – медик-шамыч изи пациент-влакым 1963 ийыште чоҥымо стационарыште эмлат. Тудын кумдыкшо санитарно-эпидемиологический правил ден норматив-влаклан келшен огеш тол, сандене черле-шамычым кӱлын эмлаш да диагностике пашам шукташ пеш неле.

6,5 тӱжем квадрат метр кумдыкан у корпусышто кӱлешан медицине оборудованийла дене шыҥдарыме 70 бокс да тичмаш реанимаций лийыт. Тидыже, мутат уке, инфекциян чер дене черланыше йоча-влаклан медицине полышым пуымо качествым палынак саемдаш полша.

2024 ий декабрьыште Российын Тазалык аралтыш министерствыж дене инфекционный корпусым чоҥаш федеральный бюджет гыч субсидийым ойырымо нерген ешартыш келшыкым ыштыме. Бюджет ассигнованийын чумыр кугытшо – 780,7 миллион теҥге, тышечын 21,8 миллион теҥгеже Марий Элын бюджетше гыч ойыралтеш.

У объект дене кылдалтше чыла пашам 2026 ий сентябрь марте ыштен шукташ палемдыме. Тымарте тудо 15 процент нарылан ямде.

Маргарита ИВАНОВА

Марий Эл Тазалык аралтыш министерствын фотожо.

Опубликовать в Одноклассники

Добавить комментарий