У йӧным кучылтын, марий сыным арален кода
Республикыштына «Сеҥымаш тулсавыш» калык усталык фестиваль январьын пытартыш кечынже тӱҥалын. Тунам мастарлыкым Йошкар-Олан, республикысе Марий, Руш, Татар тӱвыра рӱдер-влакын артистышт ончыктеныт. Февральын икымше арнянже Оршанке, Шернур, У Торъял, Параньга, а вес арнянже Волжский, Юрино, Килемар, Звенигово район-влакын коллективышт выступатленыт.
Сеҥымашын ХХХ идалыкше лӱмеш тӱвыра полатыште кажне районын кидмастарже-шамыч оҥай выставкым ямдыленыт. Волжский районын артистше ден кидмастарже-влак усталыкыштым 8 февральыште ончыктеныт. Нунын коклаште Приволжский гыч кидмастар Евгения Кошкинан пашаже молын дене таҥастарымаште ятыр верым айлен. Фестивальыш мийыше калык тудын ыштыме сӧрастарышыжым, ургымо, пидме вургемжым ятыр жап ончен шоген, ӱдырамаш дене мутым вашталтен.
Евгения Кошкинан кидпашаже-влак чынак ойыртемалтше улыт. Калыкын йодмыж почеш сумкам, сӧрастарышым ышта, ӱдырамаш вургемым пидеш, тӱрла, урга. Икманаш, кидше шуко сомыллан толеш.
– Южо кидпашам ыштымемлан ятыр жап эртен. Уло тугайжат, куштыжо кӱртньӧ шемемын, тӱжвал тӱсшат вашталтын, ок йылгыж, чот тоштемын. А нуным уэмдаш моткоч йӧсӧ, молан манаш гын тыгай материалжым от му, вет кызыт тудым огыт ыште. Туге гынат тӱрлӧ семын келыштараш тыршем. Ожно ший оксам кучылтыныт гын, ынде тудыжым муаш пеш неле. Мый ший оксам ушештарыше у технологий почеш ямдылыме синтетический, натуральный, шийым гай койшо материалым кучылтам, тӱрлӧ сакыш-влакым погем.
Евгения ургымо, пидме вургемышкыже марий орнаментым пурта. Тудын ӱдырамаш-влаклан марий тӱр дене сӧрастарыме пидме шокшо вургемже кажнын кумылжым савыра, шонена. Коваште гыч ургымо сумкажымат марий тӱр дене сӧрастарен, но сынжым тачысе илышлан келыштарен.
Евгения пашаштыже тӱрлӧ йӧным кучылтеш, но тыгодым марий сыным арален кодаш тырша. Тудын шке ойыртемалтше стильже уло. Кажне пашаштыже кидмастар палыжым шында. Тидыже ты пашан авторжым вигак палаш полша.
Михаил СКОБЕЛЕВ,
Лидия ШАБДАРОВА
Михаил Скобелевын фотожо
