Марий Эл Избирком председатель Ирина Татаринова теҥгече журналист-влак дене вашлиймаште тыге палемден:
– Марий Элыште илыше-влаклан йӱклаш 6, 7, 8 сентябрьыште 494 пӧлем шке омсажым почеш. Сайлымаш участке-влак 8 гыч 20 шагат марте пашам ышташ тӱҥалыт.
Еҥ-влак уло республикын законодательный кучемжым сайлат, а лачшымак – Кугыжаныш Погыныш 52 депутатым, муниципал образований-влакын представительный органлашкышт 1301 депутатым.
Кажне избирательлан 3 бюллетеньым пуат да нуно ик мандатан округышто Кугыжаныш Погыныш, партийный списке дене да верласе Депутат-влак погынымашлашке кандидат-влакым ойырен налыт.
Молгунамсе семынак сайлымаш участкыш миен, тыгак комиссийым шке деке мӧҥгышкӧ ӱжыктен да республикыште икымше гана кучылталтше у йӧн дене электронно йӱклаш лиеш. ДЭГ дене пайдаланаш Марий Элыште 53497 избиратель йодмашым пуэн. Кундем шот дене нуно кеч-кушто йӱклен кертыт. Тидлан 6 сентябрьыште 8 шагат гыч 8 сентябрьыште 20 шагат марте vybory.ru порталыш пурыман да йӱклыман.
– Ме кужун ямдылалтынна! Сайлымаште 4944 УИК еҥ, 173 ТИК еҥ да Избиркомын 14 еҥже пашам ышташ тӱҥалыт. Кугыжаныш Погыныш сайлымашлан 1049600 бюллетеньым да муниципал сайлымаш-влаклан 524579 бюллетеньым ямдылыме. «Открытость» да «гласность» манме лийшашлан йӱклымӧ 483 пӧлемыште видеорегистраторым вераҥдат. 99 избирательный участкыште КОИБ полшымо дене йӱклат. Республикын Мер палатыже, партий ден кандидат-влак деч 1978 эскерыше лийыт. 12 СМИ 60 журналистым аккредитироватлаш йодмашым пуэн, – палдарен Ирина Татаринова.
Тудын ойлымыж почеш, инвалид еҥ-влаклан йӱклашышт ешартыш йӧным ышташ 12 участкыште сурдопереводчик-шамыч лийыт, а 23 участкылан начарын ужшо-влаклан шкевуя йӱклашышт Брайль шрифтан сайлымаш бюллетень-влакым ямдылыме да тифломаркерым налме.
Лӱдыкшыдымӧ лийже манын, участкылаште МВД пашаеҥ-влак дежуритлат. Чот дене эн шуко избиратель улмо участкыласе йӱклымӧ пӧлемлаште 128 металлодетектор вераҥдалтеш. Молыштыжо ручной манме дене пайдаланат.
– Республикыште илыше-влакым чылаштымат сайлымашке ушнаш ӱжына! – каласен вашлиймаш мучаште Марий Эл Избирком председатель Ирина Татаринова.
Любовь Камалетдинова
Авторын фотожо
