УВЕР ЙОГЫН

У ий толеш – идалыкын Озажлан келшаш кӱлеш!

Вашке эн вучымо У ий пайремна толын шуэш! 2023 ий пиалан лийже манын, идалыкын озажлан, Шем Вӱд Кроликлан (Мераҥлан, Пырыслан), кузе келшыман? Тидлан мом ыштыман? Нине йодышым рашемдаш тыланда полшаш тыршена.

 

Ласка да пиалан илыш вуча!

Эн ончычак Кролик ий нерген кӱчыкын палдарена. Шукынжо тиде янлык лӱдшӧ, ӧрмалгыше манын шонена. Уке, тудо писе, чоя, лӱддымӧ, тыгодымак шыма, ласка да тынысым йӧратыше. Сандене шушаш ийыште кӧ тыгаяк лиеш, шке ончылныжо кугу цельым шында да тушко шуаш тыршаш тӱҥалеш, кӧ илышыжым вашталташ тарвана, лач тудланак Кролик полша да мелын лиеш. Такшым тудын идалыкше 1 январьыште огыл, а 21 гыч 22 январь йӱдым, 23 шагатат 56 минутлан, тӱҥалеш.

Астролог-влакын палдарымышт почеш, 2023 ий сай велыш вашталтышым, ласкалыкым да улан илышым конда. Шкет еҥ-влак шӱмбелыштым вашлийын кертыт. Мужыран-шамыч ушнат, а ушнышо-влак йочам ыштат. Ешан-шамычын  илышышт куандарыше да пеҥгыде лиеш. Шушаш ий официально огыл эше ешын идалыкшылан шотлалташ тӱҥалеш. Сандене У ийым еш дене вашлияш утларак келшен толеш.

 

Вургем могай тӱсан лийшаш?

Тидым рвезе ден пӧръеҥ-шамыч пешыже шотыш огыт нал, а теве ӱдыр ден ӱдырамаш-шамыч поснак кугу тӱткышым ойырат.

Тений тӱс нерген чотшак тургыжланышаш уке. Молан манаш гын Кроликлан нарынче, лимон да охра тӱс веле огыт келше. А молыжлан тудо куана гына. Тиде йошкар, кына, чалка, канде, ошалге-канде, ужарге, тыгак кешыр гай, йошкарге-нарынче да шем тӱсан лиеш гын, сайрак. Иктаж-мом йылгыжшым ешарен кертыда, вет вӱд эреак йылгыжеш.

Вургем ишыше але кап пелен чот пижше огыл, а лопкарак лийшаш, молан манаш гын Кролик шуко тарванылаш йӧрата. Тыгодым натуральный коваште да натуральный пун гыч ургымо вургемым чийыман огыл. Моланжым шкеат умыледа, очыни.

 

Ӱстембалне мо лийшаш?

Кролик, мутат уке, пакчасаскам да емыжсаскам йӧрата. Тугеже нуно, тыгак нунын гыч ямдылыме тӱрлӧ сий У ий пайрем ӱстелыште мыняр шукырак лиеш, Идалыкын озажым шке велкыда тунар чотрак савыреда!

Шыл гыч кочкыш олмеш кол, сыр да нунын гыч ямдылыме салат, закуско, моло лиеш гын, сайрак.

Кеч-могай йӱышат натуральный гына лийшаш. Сандене ӱстембаке шке шолтымо компотым, шке ямдылыме сокым шындыман. Кевытыште налме йошкар аракалан Кролик пешыже огеш сыре, но тудо шке ыштыме лиеш гын, сайрак.

Эн тӱҥжӧ, мутат уке, пайрем ӱстембалне кешыр лийшаш! Чыланат палена: тиде эн йӧратыме кочкышыжо! Но ты амаллан кӧра веле огыл тудо сий коклаште лийшаш. Кешыр – витаминлан поян пакчасаска. Поснак пӧръеҥ вийым ешараш полша, ойленыт ожно грек-шамыч. Кызытат тыгак, очыни. Арам огыл Кроликат «йӧраташ» ик эн чот кумылан янлыклан шотлалтеш. Тугеже шотыш налза…

Ӱстелым сӧрастарыме годым натуральный материалым утларак кучылташ тыршыман. Мутлан, ӱстембалшовычым йытын гыч ыштымым, адакшым ошалге-канде але ший тӱсаным шараш тыршыза. Нине тӱс Идалыкын озажлан утларак келшат. Фужер, моло чарка янда да хрусталь гыч лийыт гын, Кролик чотрак куана.

Тыгак пӱгыльмӧ ден фрукт гыч композицийым ыштен вераҥден кертыда.

 

Мом пӧлеклыман?

Тений пӧлекын акше тунар огыл, кунар лишыл да йӧратыме еҥ-влак нерген азапланыме, нунын нерген шонымо, уло кумыл дене налме аклалташ тӱҥалеш. Сандене Кролик але Пырыс сынан сувенир деч посна шокшо мотор пледым, носким, пидме шарфым, свитерым, сӧрал сервизым, кидпашам ышташ иктаж наборым, иктаж концертыш, тоштерыш билетым, органайзерым, календарьым, термокружкам, У ий сӱретан изи кӱпчыкым пӧлеклаш утларак келшен толеш.

 

Пале-влак

Шушаш идалык пиалан лийже манын, икмыняр палым шотыш налаш да шукташ тыршыман. Мутлан, ты гана коштымо шӱльӧ ден уржа парча гыч аршашым ышташ да ӱстембаке лукыш шындаш темлалтеш. Тудо поянлыкым да сай, улан илышым сӧра. Тыгак пӧрт кӧргыштӧ луклашке вӱдан атым шындыман, вет мемнан деке Вӱд Кроликын идалыкше вашка.

Эшежым кочкышан кажне кӱмыж йымаке ыршийым пыштыман. Тунам ешыште окса идалык мучко лиеш. Кочкыш шотыштат тургыжланаш огеш логал.

Ӱстел ден пӱкен йолым мотор шӱртӧ дене ваш кылдеда гын, тиде, ик велым, моторын кояш тӱҥалеш, а, вес велым, ончыкыжым ешыште да йолташ-шамыч дене икте-весе кокласе кылда пеҥгыде лиеш.

Йочам ыштынеда гын, ӱстембаке шке ямдылыме кешыр сокым шындыман, вара, у ий шумеке, тудым йӱман.

Шушаш У ий дене! Тек 2023 ий чыла поро шонымашдам шукта да пиалым конда!

Л.Камалетдинова

Опубликовать в Одноклассники

Добавить комментарий