ЙОШКАР-ОЛА КУЧЕМЫШТЕ УВЕР ЙОГЫН

У ий пӧлек: Йӱдвел рӱдолашке – поезд дене

У ий пӧлек

Йӱдвел рӱдолашке – поезд дене

У ий вашеш, 28 декабрьыште, Йошкар-Ола гыч Нижний Новгородыш да Санкт-Петербургыш икымше поезд корныш тарванен. Тидыже Марий Элыште илыше-влаклан чынжымак сай пӧлек лийын. Туге чучо, пуйто республикнан йӱдвел Кукнур кундемыштыже илыше марий Йӱштӧ Кугыза ден Лумӱдырат элнан йӱдвел рӱдолашкыже икымше поезд дене пырля шке саламыштым колтышт.

А тӱҥалынже тиде Россий президент Владимир Путинын 23 декабрьыште эртыше кугу пресс-конференцийже гыч. Республикысе «Марийская правда» газетын журналистше Анастасия Петрова Йошкар-Ола гыч моло олашке кӱртньыгорно кылым кумдаҥдаш полшаш йодын. Президент Марий Элын рӱдолаж дене транспорт кылым саемдыме нерген йодышым «Россий кӱртньыгорно» компанийын генеральный директоржо Олег Белозеровлан ончаш кӱштымыж нерген каласен. Тусо холдингыште эрлашымжак Йошкар-Ола гыч Санкт-Петербургыш Нижний Новгород гоч куснен шичде кудалме вагонлам колтымо нерген увертареныт.

Поезд тарванме деч ончыч Марий Эл правительстве председательын икымше алмаштышыже Александр Сальников, республикын транспорт да корно озанлык министрже Александр Герасименко да «Федеральный пассажирский компаний» акционер обществын генеральный директоржо Владимир Пястолов республик гыч икымше пассажир-влакым у кӱртньыгорно маршрутым почмо дене саламленыт.

«Республикысе калыклан корныш тарванаш йӧнан лийын. Марий Эл вуйлатыше Александр Евстифеевын кӱштымыж почеш регионышто корно нормативлан келыштаралтеш. Сочи, Санкт-Петербург да Москва дене авиакылым ыштыме. Ынде кӱртньыгорно дене кылна кумдаҥеш. Калык транспортын чыла видше дене пайдаланынеже. Сандене Санкт-Петербург марте у маршрут чынжымак пайдале лиеш», – каласен А.Сальников.

Кок плацкарт да ик купе вагонлам ушен шогышо составым корныш порым тыланен ужатеныт. Тушто 100 утла пассажир лийын. Корнышто поезд Арзамас, Нижний Ногород, Иваново, Ярославль, Рыбинск, Бологое олаласе… станцийлаште чарналтен. А Санкт-Петербург гыч мӧҥгешла 30 декабрьыште лектын. Тыге вагон-влак кок велымжат кече гоч кудалышташ тӱҥалыт.

Российын йӱдвел рӱдолашкыжла каяш шонышо-влаклан увертарена: билетым налнеда але поезд-влак коштмо графикым рашемдынеда гын, тидым «РЖД» ОАО-н официальный сайтыштыже, «РЖД  Пассажирам» мобильный приложенийыште, тыгак кӱртньыгорно кассылаште ышташ лиеш.

Ю.Исаков

 

Опубликовать в Одноклассники

Добавить комментарий