Эн вучымо да йӧратыме У ий пайремна теве-теве лишемеш. Тудым кажныже оҥайын да ушеш кодшын вашлияш шона.
Йолташ-влак, ю шӱлышан ты пайремым кушто да кузе вашлийыда? Ӱстембаке ойыртемалтше але йӱлаш пурышо могай кочкышым ямдылаш шонеда? У ийым вашлийме иктаж йӱлада ала эше уло?
Наталия АЛЕКСЕЕВА, М.Шкетан лӱмеш Марий национальный драме театрын артистше:
– У ийым йолташ-влак дене, икмыняр еш чумырген, вашлияш шонена.
Пайрем кочкыш шотышто эше каҥашена: кажныже могай-гынат чесым ямдылаш, ӱстембалым моторын сӧрастараш шонена.
Мылам «Гранат браслет» салат пеш келша, садлан эн ончычак тудым ыштынем. Тений У ий поснак ю шӱлышан: Йӱштӧ кугыза дене пырля йоча-влакым мӧҥгышкышт саламлаш кошташ тӱҥалына, ты гана Лумӱдыр лиям.
Сергей ПОПОВ, «Каче-влак» группын солистше:
– У ийым авам да лишыл родо-тукымем дене пырля ялыште вашлияш тӱҥалына. Ӱстембаке чесым погымо шотышто авам пеш мастар, тудо кажне гана ойыртемалтше кочкышым ямдылымыж дене мемнам куандара. Авамын ямдылыме голубцыже ден солянкыже поснак эн тамле.
Людмила ЕФРЕМОВА-АКОШКИНА, Звенигово посёлкысо Калык мастарлык пӧртын специалистше:
– У ийым еш дене эреак вашлийына, сандене ты ганат – тыгак. Кажне гана ойыртемалтше да тӱрлӧ кочкышым ӱстембаке погаш тыршена, а ик эн йӧратымыланна «Ужга йымалсе селёдко» ден «Оливье» шотлалтыт.
Пайремлан пельменьым уло еш дене лӱмынак ямдылена, садлан тудым чыланат йӧратен кочкына.
Аля ЭДДИН-ГЕЗАЛИ, МарГУ-н студентше, VI курс:
– Куд ий ончыч Алжир гыч Российыш илаш кусненам. Тынарак ий У ийым йолташем-влак дене пырля Йошкар-Олаште вашлиям. Пайрем ӱстембаке тӱрлӧ салатым ямдылена. Кажне гана тӱрлӧ да ойыртемалтше рецептым кычалаш тыршена. У ий ю шӱлышым, волгыдо кумылым пӧлеклыше пайрем, садлан тудым сайын вашлийман.
Людмила АЛЕКСЕЕВА, йоча дене шинчыше (Моско ола):
– У ийым тӱҥ шотышто ача-ава дене вашлийына, но тений шке ешна дене пайремлаш шонен пыштенна. Йӱла почеш пайрем кечын йоча-влак деке Йӱштӧ кугыза толеш, но тунам тудлан изижге-кугужге почеламутым каласкала, кож йыр, кид кучен, у ий мурым йоҥгалтарат.
Ӱстел сий кокла гыч ойлаш гын, коҥгаш кӱктымӧ пареҥге – эн тутло кочкышна. Ялысе коҥгаште ямдылыме эн тамле, эн пайдале.
Алевтина БАЙКОВА ямдылен
Авторын фотожо
