Кушкыжмын Я.Эшпай лӱмеш Марий кугыжаныш филармонийыште тӱвыра да сымыктыш образовательный организаций-влакын вуйлатышышт ден педагогический пашаеҥ-влакын республиканский конференцийышт эртаралте. Тушко Марий Эл правительстве председательын алмаштышыже – республикын тӱвыра, савыктыш да калык-влакын пашашт шотышто министр Константин Иванов, министрын алмаштышыже Михаил Матвеев толыныт.
Тенийысе конференцийын темыже тыгай ыле: «Управление развитием кадрового потенциала отрасли культуры на современном этапе». Погынышо-влаклан республикыште художественный образованийын 2023-2024 тунемме ийым иктешлыше фильмым ончыктышт. Умбакыже Константин Иванов тӱвыра да сымыктыш сферын, художественный образованийын шушаш тунемме идалыклан задачыже-влак нерген ойлыш. Тудо кызытсе сӱрет дене палдарыш. Кадр шотышто йодыш поснак пӱсӧ манын каласыш. Тиде чырым пытарышашлан И.С.Палантай лӱмеш Марий республиканский тӱвыра да сымыктыш колледж пелен Региональный карьер рӱдерым почаш темлыш. Палдарымыж почеш, тачысе кечылан кугыжаныш театрлашке, муниципал тӱвыра учрежденийлашке да йоча сымыктыш школлашке 534 специалист кӱлеш.
– Опытан пашаеҥ-влак каят, а нуным вашталташ еҥ уке. Тиде рӱдер выпускник ден республикысе тӱвыра учреждений, пашам пуышо-влак дене ваш ушышо звено лийшаш, – каласыш министр.
Тыгак тудо республикысе книгагудо-влаклан кадрым ямдылыме шотыштат пашам ышташ кӱлеш манын каласыш.
Улшо нелылыкым сеҥаш элыштына 2025 ий 1 январь гыч «Кадры» у нацпроектым илышыш пуртымат полшышаш, палемдыш. Тыгодым кадрым ямдылыме шотышто тӱвыра да сымыктыш учреждений ден организаций-влак шкештат чотак тыршышаш улыт, ойлыш.
Нуно ты шотышто лачшымак мом ыштат – тиде да икмыняр моло нерген Марий кугыжаныш университетын философий ден социально-культурный технологий кафедржым вуйлатыше Марина Мамонтова, И.С.Палантай лӱмеш Марий республиканский тӱвыра да сымыктыш колледжын директоржо Алексей Паскичев, Йошкар-Оласе художественный училищын директоржын алмаштышыже Олеся Орлова, И.С.Палантай лӱмеш Марий республиканский тӱвыра да сымыктыш колледжын «Камертон» республиканский ресурсный учебно-методический рӱдержын вуйлатышыже Лариса Никифоровская каласкалышт.
Конференцийыште «Идалыкын туныктышыжо» конкурсышто сеҥыше-влаклан наградым кучыктышт. А тиде Ольга Васильева (Юбилейный поселкысо ДШИ), Эльвира Егорова (Йошкар-Оласе 6-шо №-ан ДШИ), Владимир Мамаев (Йошкар-Оласе 1-ше №-ан Йоча художественный школ), Дарья Тургенева (Волжск оласе ДШИ), Римма Яковлева (Морко ДШИ), Надежда Лукиянова (И.С.Палантай лӱмеш Марий республиканский тӱвыра да сымыктыш колледж), Татьяна Сагельдина (Йошкар-Оласе художественный училище), Людмила Черновская (И.С.Палантай лӱмеш Марий республиканский тӱвыра да сымыктыш колледж) лийыныт.
Мероприятий мучаште Йоча искусство школлаште пашам ыштыше да тунемше-шамыч погынышо-влаклан концертым ончыктышт.
А художественный образований сферыште тыршыше-влак у тунемме ийлан кузерак ямдылалтыныт? Организаций ден учрежденийлаштышт иктаж-мо у лиеш мо? Нине йодышым конференций тӱҥалме деч ончыч икмыняр еҥлан пуышым.
Римма Сапаева, Йошкар-Оласе 4-ше №-ан Йоча сымыктыш школын директоржо:
– Рӱдоласе моло школ дене таҥастарымаште мемнан школна изирак. Тушто 5 гыч 14 ияш марте 157 икшыве тунемеш. Нунын кокла гыч пелыже деч шукырак, 81 ӱдыр-рвезе, живописьлан утларак кумылан.
Тӱрыс налмаште, материальный базына сай. У тунемме ий вашеш косметический ремонтым ыштенна.
Мемнан коллективна изи, но моткоч ваш келшыше. Адакшым утларакше самырык-влак тыршат. Палантай лӱмеш республикысе тӱвыра да сымыктыш колледжыште пашам ыштымем годым ончыч нуно студентем лийыныт, а кызыт коллегем улыт. Сандене у тунемме ийым кумыл нӧлтын вучем.
Лариса Петрова, Волжский районысо Йоча сымыктыш школын туныктышыжо:
– Мый Упшер тӱвыра пӧртыштӧ верысе школыш коштшо ӱдыр-рвезе-влакым скрипкам шокташ да хорышто мураш туныктем. У тунемме ий вашеш шканем да икшыве-шамычлан нотный литературым уэмденам, у муро-влакым, скрипка дене шокташ у программым ямдыленам, выступатлашышт у костюмым ыштенна. А семӱзгар-влакым уэмдаш полшат манын ӱшанена. Мый шке пашамым йӧратем, сандене у тунемме ийым куанен вучем.
Любовь Камалетдинова
Авторын фотожо
