Марий Турекыште руш, марий, суас, удмурт да татар калык-влак келшен илат. А посёлкыжым кум ужашлан шелме: Кӱшыл Турек, Ӱлыл Турек, Эҥерымбал ялысе урем.
Кумшыжо мылам эн кужула чучо. Пытартыш жапыште посёлкышто у уремже ятыр шочын, Эҥерымбал ялыште – поснак. Теве тыгаяк лӱман урем, вара – Молодежный, Комсомольский, Луговой, Мосолов да молат. Эҥерымбалыштыже шинчамлан тошто капка перныде ыш керт. Тудым Веденей Беленков ачаж дене коктын ыштеныт. Оҥайлан, пелашыже Элебий лӱман лийын. Беленковмыт ешым посёлкышто шукынжо сай кидмастар семын палат. Кочажын суртшо нерген тудын уныкаже Сергей Петрович Беленков каласкалыш. Шке жапыштыже тудо Йошкар-Оласе совхоз-техникумым пытарен, варажым верысе Ленин колхозышто механиклан тыршен.
– Посна бригаде дене пырчым эрыктен-коштымо комплексым погенна, – шарналта кидмастар. – Вара верысе СПТУ-што производство мастерлан пашам ыштенам. Ялысе рвезе-влакым, группышто 40 тунемше лийын, кечыште 6 шагатым туныктенам.
Эн ончычшо Сергей Петрович шке пашажым кӱртньӧ дене кылден: сад-пакчалан йӧршӧ кӱртньӧ ӱзгарым да молым ыштен, амалкалче семын тыршен а кызыт – сулен налме канышыште.
– Кугезе Веденей кочам пеш тале кидмастар тукым гыч улмаш, – умылтара тудо.
Ачаж деч тошто кок оралте гыч капка да сурт кодыныт. А кече тӱран сылнештарыме капкам вес уремыштат ужынам.
– Ачам – Петр Веденеевич, фронтовик, финн, Кугу Отечественный сарыште лийын. Ончычшо кавалерист лийын, Семен Будённый дене кум ий служитлен. Тудын имньыжым ончен улмаш. Вара финн сарыште водительлан тыршен. Тушеч пӧртылын веле – Кугу Отечественный сар тӱҥалын. Тудым
кокымшо кечынак Йошк
ар Армийыш налыныт. Сусырген огыл, сар гыч таза пӧртылын. Юмо умбакыже илаш арален. Мемнан ешыште вич йоча гыч нылытше акам-шамыч лийыныт. Мый ачам-авам дене иленам. Ачам 93 ийым илен, а 2003 ийыште почела авам дене вес тӱняш каеныт.
Теве тыгай еҥ-влак дене вашлийым, шуко оҥайым пален нальым да чылажат – тошто капкалан кӧра…
М.СКОБЕЛЕВ
Авторын фотожо.
Снимкылаште: 1224 Беленковмытын тошто суртшо 1220 С.Беленков 1151,1174 Марий Турек посёлко 1178 С.Шишкинын суртшо 1184,1186 Тошто капка 1175 У урем 1181 Лумым корно гыч эрыктат.
