Геннадий Сабанцев
Тыгеже вуймутыш лукмо ой – поэт Валентин Колумбын почеламут циклжын лӱмжӧ. Но чапланыше сӱрет мастар, Россий Федерацийын сулло да Марий Элын калык художникше Иван Ямбердоват чон нӧлтын тыгак каласен кертеш. Такше «кертеш» веле огыл, а тидым шке усталык ӱмырыштыжӧ чарныдеак ӱшандарен толеш. Имне теме тудын сӱретлыме пашаштыже шке шотан верым налеш. Тидым ме Йошкар-Олан историйже тоштерыште почылтшо ончерыштыжат пеш раш ужына.
Художникын радыналаштыже имне тӱрлӧ шӧрын гыч почылтеш. Но эн тӱҥжым палемден кодена: куатле, йытыра тиде вольык – вольык веле огыл, а жапын, эрыкын, сорлыклен чараш лийдыме вийын символжо. Тыгак порылкым, айдемылан ӱшанле улмым, моторлыкым ончыктышо чолга пале. Автор чыла тидым шкланже келшышын гына чия да усталыкше полшымо дене почын пуэн.
Ончерым почмо годым (27 февраль) Иван Ямбердов имне дене кылдалтше темылан шкенжын шонымашыж дене палдарыш, тидлан тудым кумыл нӧлталаш мо таратыме, сӱрет-влак кузе шочмо нерген каласкалыш.
Ончер 29 март марте шуйна.
