Таче «Марий Эл верч» поро кумыл фонд гыч специальный военный операцийым эртарыме кумдыкыш гуманитар грузым 45-ше гана колтымо. Тушто Марий Элым вуйлатыше Юрий Зайцеват лийын. .
Грузым: начар корныштат сайын кудалыштше 8 автомобильым, мотоциклым, квадрокоптер ден тепловизор-влакым, радиооборудованийым да шуко моло электроникым – сарзе землякна-шамычын йодмышт почеш чумырымо.
Муниципал образований, мер организаций, амалкалче да сеҥымашым лишемдыме верч тыршыше граждан-влакын полшымышт дене квадроциклым, икмыняр пушым, генераторым, коҥгам, токарный станокым, рабица манме сеткым, вочкым, маскироватлыше сетьым, автомашиналан шапаш ужашым, тӱрлӧ ӱзгарым, медикаментым, йоча сӱрет ден серышым колтымо.
Республикын Пӱртӱс поянлык, экологий да йырвелым аралыме министерствыже 20 кубометр чодыра материалым ямдылен.
«Гуманитар грузым чумырымо, автофургоныш оптымо да СВО кумдыкыш наҥгаен кодымо кугу пашам «Марий Эл верч» поро кумыл фонд пеш сайын шукта. Нине рвезе-влакын тыршымышт дене сарзына-шамычлан воинский порысым шукташышт куштылгырак лиеш», – фондын пашажым аклен Ю.Зайцев.
Сеҥымашым лишемдыме жап пеҥгыде тыл дене чак кылдалтын. Тидым сарзына-влак сайын палат. Ме нуным мӧҥгӧ кугу сеҥымаш дене вучена.
М.ИВАНОВА
Д.Речкинын фотожо/ Марий Элым вуйлатышын пресс-службыжо
