Марий Элыште «Работа России. Время возможностей» пашам муаш полшымо всероссийский ярмиҥган регионысо йыжыҥже эртен.
Тушто республикысе 200 утла предприятий шке компанийже да тыршыше пашаеҥ-шамычлан карьер йӧн нерген каласкален. Калыкым УФСИН, военный комиссариат гай силовой структур (снимкыште), оласе ММЗ, ЗПП гай кугу предприятий, йоча-влакын тазалыкыштым пеҥгыдемдыме лагерь, банк-шамыч да молат шке пашашкышт ӱжыныт.
Соискатель-влаклан 2500 утла вакансийым: квалификацийдыме паша гыч вуйлатыме должность марте – темлыме. Кужу жаплан пашаш пураш, кеҥеж пагытлан да практикым эртыме жаплан пашам муаш йӧн лийын. Чыла вакансийым «Работа в России» единый цифровой платформыш вераҥдыме.
Тиде мероприятийыште пашам кычалше 3500 утла еҥлан – пашадыме, школьник, студент, угыч тунемаш але паша аланым вашталташ шонышо-влаклан – профессийым ойырен налаш полшымо тестым эрташ, пашам пуышо-шамыч дене шинчаваш мутланаш, кызыт поснак кӱлешан специальностьым пален налаш, темлыме вакансийын уто-ситыжым рашемдаш йӧн лийын.
Ярмиҥгам иктешлыме почеш, пашам кычалше граждан-влак собеседованийым эртеныт, кӱлешан документым оформитленыт, резюмештым коденыт. Таче кечылан 100 утла еҥ пашаш пурен, 600 граждан профессийым ойырен налаш полшымо тестированийыш возалтын, 80 наре еҥ пашам пуышын собеседованийышкыже ямдылалтеш, 57 граждан производственный практикым эрта.
«Работа России. Время возможностей» пашам муаш полшымо ярмиҥган регионысо йыжыҥыштыже тӱрлӧ амалан кӧра лийын кертдыме еҥ-влак тудын йӧнжӧ-шамыч дене 23 июньышто пайдаланен кертыт. Тиде кечын ярмиҥган кокымшо йыжыҥже кок форматыште: очно да онлайн – эрта. «Работа России» порталыште посна ресурсым ыштат, да кумылан-влак тушто ончылгоч регистрироватлалтын кертыт.
М.ИВАНОВА
Фотом Марий Элын Паша да социальный аралымаш министерствыж деч налме
