Печать пӧртыштӧ Россий Журналист ушемын Марий Элысе пӧлкаже профессионал пайремлан пӧлеклалтше мероприятийым эртарен. Туштат идалык мучко ойыртемалтше журналист-влакым тӱрлӧ министерстве ден ведомство палемденыт, Марий Эл Тӱвыра, савыктыш да калык-влакын пашашт шотышто министерствын да ушемын эртарыме конкурсыштым иктешленыт.
Тачысе кечылан журналист организаций 300 утла еҥым уша. Тудым ынде идалыкат пеле жап Александр Абдулов вуйлата. Организаций журналист- влакым кумылаҥдыше, икте-весе коклаште кылым пеҥгыдемдаш полшышо мероприятийымат ятыр эртара. Саламлаш толшо Марий Эл правительстве председательын алмаштышыже-тӱвыра, савыктыш да калык-влакын пашашт шотышто министр Константин Ивановын ойлымыжо шарналтеш: «Савыктыш – илышын воштончышыжо, йырым-йыр вашталт толмым лач те ончыктеда. Газет, журнал, книга таче садак ик эн чын уверым пуышо да калыкнан йӱлаже ден историйжым аралыше семын кодыт. Тек тендан мастарлыкда сай уверым да мутын тӱвыражым аклыше-влакым ончыкыжымат куандараш тӱҥалеш».
Журналистын принципше-влакым, да поснак тудын социальный ответственностьшо лийме нерген ушештарен. Тачысе неле саманыште тиде мемнан пашаште моткоч кӱлешан. «Защитники Отечества» фондын вуйлатышыже Ренат Магсумов, Росгвардийын республикысе виктемжым вуйлатышын алмаштышыже, полковник Георгий Кузьменко тидым пеҥгыдемдышт. Журналист-влакым саламлаш, ойыртемалтше-шамычлан тауштымашым кучыкташ толмышт куандарыде кертын огыл.
Редакцийыштынат тений сеҥымаш шагал огыл. Марий Элын Тӱвыра, савыктыш да калык-влакын пашашт шотышто министерствыжын эртарыме патриотический воспитаний темылан пӧлеклалтше «Патриоты России» конкурсышто редакцийын коллективше «Республикысе газетыште эн сай материал» номинацийыште сеҥышыш лектын. СВО-н участникше-влак нерген сайын возен шогымынам акленыт. Тиде теме денак Елена Эшкининан пашажым Журналист ушемын эртарыме конкурсыштыжо ик эн сай семын палемденыт.
«Патриоты России» конкурсыштак Галина Кожевникова «Молодая Россия» номинацийыште эн сай журналист семын палемдалтын. Любовь Камелетдинова ты министерствынак эртарыме «Чистые руки и честные помыслы» коррупций ваштареш кучедалме республиканский конкурсышто сеҥен. Юрий Исаков тыгак журналист ушемын конкурсыштыжо «Печатлыме да сетевой изданийыште эн сай материал» номинацийыште ойыртемалтын. Фотограф Михаил Скобелевын пашажат «Эн сай фотографий» номинацийыште палемдалтын. Марий Эл Кугыжаныш Погын деч Чап Грамотым тӱҥ редакторна Светлана Пехметовалан кучыктеныт.
Молгунам Печать кечылан пӧлеклалтше мероприятий тӱрлӧ вере эртаралтын гын, тений тидым лачшымак Печать пӧртысӧ рестораныште ыштыме ойыртемалтше кумылым луктын. 1984 ийыштак чоҥен шындыме 11 пачашан оралтыште тачат республик кӱкшытан чыла гаяк кугу газет редакций- влак вераҥыныт.
Светлана Носова
Снимкыште: «Марий Эл» увер агентствын пашаеҥже-влак мероприятий годым.
И.Речкинын фотожо