ОБРАЗОВАНИЙ ШКОЛ ЙОЛГОРНО

Тунемме вер уэмдалтеш – кумыл нӧлталтеш

Россий Федерацийын «Образований вияҥмаш» кугыжаныш программыж дене келшышын, элна мучко школ системым уэмден вияҥдыме дене кылдатше проект илышыш шыҥдаралтеш. Тушко тений Марий Элын куд общеобразовательный организацийжым пуртымо. Тиде – Марисола, Лажъял, Шабдар Осып лӱмеш Мустай (Шернур район), Матародо, Г.Курмаш лӱмеш Мераҥсола ( Параньга район), Медведевысе 3-шо №-ан школ-влак. Кызыт палемдыме тунемме верлам капитально олмыктымо паша мучашке лишемеш. Нунын кокла гыч иктыжын – Шернур районысо Шабдар Осып лӱмеш Мустай школын – вуйлатышыже Людмила Глушкова дене мутым вашталтышна.

– Людмила Георгиевна, школым уэмдыме паша кузерак кая: кызытлан мо ышталтын да мом эше ыштен шуктымо огыл?

 – Школ системым уэмден вияҥдыме дене кылдалтше проект почеш, мемнан школым капитально олмыкташ нылле вич миллион утла теҥгем да тидын деч посна эше кок миллионат пелым ойырымо. Паша тений апрельыште тӱҥалшаш ыле, но тергымаш-шамычлан кӧра 14 май гыч гына тӱҥалме. 2022 ий 25 августлан школ ямде лийшаш. Мыйын шонымаште, ме тиде жаплан пашам мучашлена. Кызытлан спортзал пӱтынек ямде: кӱварым чиялтенна, канализацийым, тыгак ырыктыме системым, окнам, омсам да молымат чылажымат уэмдыме.

Школын кок пачашыштыжат окна-шамычым пластикан дене алмаштыме, вашталтыме, пӱтынь зданийыште ырыктыме системым да молымат вашталтыме. Икманаш, изишак штукатуритлаш, чиялташ кодын. Тыгак кӱварыш линолеумым шарене пытарыме огыл – тидым кум кабинетыште гына ыштыме. Столовыйым тыгак уэмдыме, тусо кӱварыш сай качестван плиткым оптымо, ынде кочмыверна волгыдо. Школ леведышна моткочак тоштемын ыле, вӱд пурен, санденак пырдыж эреак ночко лийын. Ынде тудымат уэмденыт. Школ пелен дошкольный группо уло, тудымат шотыш кондымо.

– Тунемме верыште капитально олмыктымо пашам кунамсек ыштыме огыл?

– 1991 ий гычак. Чыным ойлаш гын, тиде проектыш пурена манын, ӱшанымылат чучын огыл, сандене моткоч куаненна. Вет олмыктымо деч посна мебелят уэмдалтеш: у парт-влак, тачысе кечылан келшыше доска да моло оборудований. Компъютер-влак гына кызытеш тоштак кодыт, но ончыкыжым ноутбук-шамычым пуат манын ойленыт.

– 2021-2022 тунемме идалыкыште школыш мыняр йоча коштын? Тунемше-влакын чотышт кугемеш але…

– Эртыше тунемме ийыште чылаже витле кум тунемше лийын, а дошкольный группыш коло икшыве коштын. Икымше классыш тений кок йоча толеш, латикымше классым тынарак тунем пытарен да тынарак тений лиеш. Тунемше-влакын чотышт нерген ойлаш гын, пытартыш ийлаште тудо икнарак кодеш.

– Туныктышо-шамыч шотышто мом каласеда?

– Самырык педагогна-влак улыт, но тӱҥ шотышто кугу стажан-влак пашам ыштат, коктын эсогыл кудло вич ийым эртышат. Кызытлан марий да тыгак англичан йылмылам туныктышо-влак кӱлыт. Чыным ойлаш гын, самырык-влак школышто пашам ышташ кумылан огытыл. Нуным умылашат лиеш, пашадар чынжымак изи, санденак икмыняр жап ыштымеке, нуно каят веле. Тыге адакат меак – шуко ий туныктышо, патриот шӱлышан-влак – гына кодына. Ончыкыжым мо лиеш ала?

– 2023 ийым Россий Федерацийын президентше Владимир Путин Педагог ден наставник-влакын идалыкышт семын увертарен. Тудын деч мом вучеда?

– Туныктышо-влакын пашадарышт кӱлеш кӱкшытан лийже.

Г.Кожевникова

Фотом школын архивше гыч налме

Опубликовать в Одноклассники

Добавить комментарий